Էլազըղի ոստիկանության վրա հարձակման մեջ մեղադրվող անձինք են ձերբակալվել

Տարածաշրջան13:52, 02 Հունիս 2017

Էլազըղի ոստիկանության վրա հարձակման մեջ մեղադրվող անձինք են ձերբակալվել

Թուրքիայի Դիարբեքիր նահանգի Լիջե շրջանում կալանավորվել է 3 հոգի, որոնք կասկածվում են 2016թ. օգոստոսի 18-ին Թուրքիայի Էլազըղ (Խարբերդ) շրջանի ոստիկանական բաժանմունքի վրա իրականացված հարձակմանը մասնակցություն ունենալու մեջ:

Այդ մասին տեղեկացնում է թուրքական «Haberler» լրատվամիջոցը՝ հղում անելով Դիարբեքիրի նահանգապետարանի հայտարարությանը:

Միջանկյալ նշենք, որ 2016թ. օգոստոսի 18-ին քուրդ զինյալները Էլազիգի ոստիկանական բաժանմունքի դիմաց ռումբ էին պայթեցրել, որի հետևանքով սպանվել էր 5 ոստիկան, 217 հոգի էլ վիրավորվել էին:

Նշվում է, որ ընդհանուր առմամբ բերման է ենթարկվել 12 մարդ, որոնցից 9-ը՝ ցուցմունք տալուց հետո ազատ են արձակվել: Իսկ մնացած 3-ի նկատմամբ կալանավորման որոշում է կայացվել

Հիշեցնենք, որ մայիսի 30-ին առավոտյան Թուրքիայի Դիարբեքիր նահանգի Լիջե, Դիջլե, Հանի և Քոջաքյոյ շրջանների 43 գյուղերում հայտարարվել է պարետային ժամ՝ «Քուրդիստանի բանվորական կուսակցության» (ՔԲԿ-PKK) զինյալների դեմ ռազմական գործողությունների շրջանակներում:

Աղբյուր` Ermenihaber.am