Թուրքական կայքերը տարածում են հայ դիվերսանտ գերեվարելու մասին Բաքվի ապատեղեկատվությունը (տեսանյութ)

Տարածաշրջան14:08, 21 Հունիս 2017

Թուրքական կայքերը տարածում են հայ դիվերսանտ գերեվարելու մասին Բաքվի ապատեղեկատվությունը (տեսանյութ)

Թուրքական մի շարք լրատվակայքեր (haberler, sondakika, ensonhaber, tgrthaber), հղում տալով Ադրբեջանի պաշտպանության նախարարության հրապարակած տեղեկությանը, հայտնում են, որ հունիսի 20-ի լույս 21-ի գիշերը ադրբեջանական ուժերը գերեվարել են հայ դիվերսանտի:

Ըստ նույն աղբյուրի՝ որպես հայ դիվերսանտ ներկայացվող Զավեն Հովհաննեսի Կարապետյանը խոստովանել է, որ ծննուդով Նոյեմբերյանի Դովեղ գյուղից է, դիվերսիոն գործողության ժամանակ չի կարողացել փախսուտի դիմել, փորձել է թաքնվել, բայց, ի վերջո, հայտնաբերվել է: Թուրքական նշյալ կայքերը, սակայն, չեն հրապարակել ադրբեջանական կողմից տարածած տեսանյութը:

Նշենք, որ ՀՀ ՊՆ մամուլի քարտուղար Արծրուն Հովհաննիսյանը արձագանքել է՝ ասելով, որ հայկական զինված ուժերում այդ անուն-ազգանունով զինծառայող չկա: Իսկ Տավուշի մարզի Դովեղ գյուղի համայնքապետ Սամվել Գորգինյանը հայտարարել է, որ այդ անուն-ազգանունով բնակիչ գյուղում չի եղել: