Կատարի պաշտպանության նախարարը մեկնել է Թուրքիա

Քաղաքական06:29, 30 Հունիս 2017

Կատարի պաշտպանության նախարարը մեկնել է Թուրքիա

Կատարի պաշտպանության նախարար Հալիդ Բին Մուհամեդ ալ-Աթիյյեն պաշտոնական այցով մեկնել է Անկարա` հանդիպելու թուրք պաշտոնակցի հետ: Ըստ թուրքական «Haberler» լրատվամիջոցի՝ հանդիպման գլխավոր թեման լինելու է Քաթարի շուրջ ստեղծված ճգնաժամային իրավիճակը: Բացի այդ կողմերը կքննարկեն Քաթարում գտնվող թուրքական ռազմաբազայի վերաբերյալ առանցքային հարցերը:

Աղբյուրը հիշեցնում է, որ Թուրքիայի կառավարության առաջարկով հունիսի 7-ին մեջլիսի լիագումար նիստում արտահերթ կարգով քննարկման դրվեց և հաստատվեց 2 երկրների միջև ավելի վաղ կնքված համաձայնագրով Կատարի տարածքում թուրքական զինված ուժերի ստորաբաժանումներ տեղակայելու նախագիծը:

Կատարի տարածքում բանակի և ժանդարմերիայի ստորաբաժանումներ տեղակայելու մասին համաձայնագրերը նախատեսվում էր ավելի ուշ քննարկել, սակայն Սաուդյան արաբիայի գլխավորությամբ արաբական մի քանի երկրների և Կատարի միջև ստեղծված ճգնաժամի պատճառով դրանք քննարկվեցին արտահերթ կարգով:

Իսկ մի քանի օր առաջ Ծոցի 4 երկրները Քաթարի իշխանություններին ներկայացրել էին 13 կետից բաղկացած պահանջների ցուցակ: Պահանջներից մեկը այն էր, որ Քաթարը փակի իր տարածքում գտնվող թուրքական ռազմաբազան:
Նշվում է, որ արդեն հունիսի 22-ին Թուրքիայից Կատար են ուղարկվել 5 զրահամեքենաներ և 25 հոգանոց զինաձնակազմ:

Հավելենք, որ Սաուդյան Արաբիան, Եգիպտոսը, Բահրեյնը, Արաբական Միացյալ Էմիրությունները, Եմենը և Լիբիան խզել են Կատարի հետ դիվանագիտական հարաբերությունները՝ վերջինիս մեղադրելով «տարածաշրջանն ապակայունացնելու» մեջ։ Կատարի հետ կապերը խզել են նաև Մալդիվյան կղզիները։

Աղբյուր` Ermenihaber.am