Բրիտանացի նախարար. Թուրքիան Մեծ Բրիտանիայի համար անփոխարինելի գործընկեր է

Քաղաքական09:11, 16 Օգոստոս 2017

Բրիտանացի նախարար. Թուրքիան Մեծ Բրիտանիայի համար անփոխարինելի գործընկեր է

Մեծ Բրիտանիայի եվրահարցերով պետնախարար Ալան Դունկանը օգոստոսի 15-ից 17-ն ընկած ժամանակահատվածում կլինի Թուրքիայում: Ըստ թուրքական «Ensonhaber» լրատվակայքի՝ նման տեղեկություն է հրապարակել Մեծ Բրիտանիայի արտաքին գործերի նախարարությունը:

Այցից առաջ Դունկանը լրատվամիջոցների հետ զրույցում խոսել է թուրք-բրիտանական հարաբերությունների մասին: Նրա բնորոշմամբ՝ Թուրքիան Մեծ Բրիտանիայի համար անփոխարինելի գործընկեր է:

Անդրադառնալով 2016-ի ամռանը Թուրքիայում տեղի ունեցած ռազմական հեղաշրջման փորձին՝ Դունկանը նշել է, որ խստորեն դատապարտում է այդ գործողությունները:

«Թուրքիան արդեն պետք է ցույց տա աշխարհին և իր քաղաքացիներին, որ ամեն ինչ կարգավորվել է: Բրիտանիան, որպես բարեկամական երկիր, պատրաստ է աջակցություն ցուցաբերել Թուրքիայի ջանքերին՝ միտված ժողովրդավարության պահպանությանը»:

Բրիտանաից նախարարը նաև շեշտել է, որ Թուրքիայի և Մեծ Բրիտանիայի համագործակցությունն անվտանգության, առևտրի և գիտատեխնիկայի ոլորտներում մեծապես օգտակար երկու երկրների համար:

Աղբյուր` Ermenihaber.am