Ռուսաստանի զինուժի գլխավոր շտապի պետը կմեկնի Թուրքիա

10:29, 24 Օգոստոս 2017

Ռուսաստանի զինուժի գլխավոր շտապի պետը կմեկնի Թուրքիա

Ռուսաստանի Դաշնության (ՌԴ) զինուժի գլխավոր շտաբի պետ Վյաչեսլավ Գերասիմովը կմեկնի Թուրքիա: Այդ մասին հայտնում է թուրքական «Ahaber» լրատվամիջոցը:

Աղբյուրի համաձայն՝ վերջին օրերին տարբեր երկրների բարձրաստիճան զինվորականների այցերը Թուրքիա պայմանավորված են Սիրիայում և Իրաքում տեղի ունեցող իրադարձություններով: Սիրիայում և Իրաքում տիրող իրավիճակի հետ է կապվում նաև Թուրքիայի նախագահ Ռեջեփ Թայիփ Էրդողանի՝ Հորդանան կատարելիք այցը:

Կարևորվում է նաև, որ Թուրքիայի արտաքին գործերի նախարարը մեկնեց Իրաք, ապա Հյուսիսային Իրաքի քրդական ինքնավար շրջան, որտեղ առանցքային հանդիպումներ ունեցավ:

Նշվում է, որ այժմ Թուրքիային մեծապես անհանգստացնում է ոչ միայն ԱՄՆ-ի կողմից Սիրիայի քրդական ուժերի ցուցաբերած աջակցությունը, այլև իրաքյան Քուրդիստանում սեպտեմբերի 25-ին սպասվող անկախության հանրաքվեն: Բացի դրանից պաշտոնական Անկարայի համար մեծ խնդիր է, որ Սիրիայի քրդական ուժերը մեծացնում են իրենց ազդեցությունը սիրիական Աֆրին շրջանում, որն այժմ գտնվում է քրդերի վերահսկողության տակ:

Այս ամենը ըստ աղբյուրի՝ պատճառ է հանդիսանալու, որ Թուրքիան «Եփրատի վահան» ռազմական գործողության նման ևս մի օպերացիա սկսի: Հիշեցվում է, որ այդ ուղղությամբ արդեն ազդակներ եղել են:

Աղբյուր` Ermenihaber.am