Իրանի փոխնախագահը Թուրքիայում է

Տարածաշրջան11:16, 19 Հոկտեմբեր 2017

Իրանի փոխնախագահը Թուրքիայում է

Իրանի Իսլամական հանրապետության (ԻԻՀ) փոխնախագահ Իսհաք Ջիհանգիրին մեկնել է Թուրքիա: Ըստ թուրքական «Haber7» լրատվամիջոցի՝ Ջիհանգիրին հանդիպել է Թուրքիայի վարչապետ Բինալի Յըլդըրըմի հետ, ում հետ առանձնազրույց է ունեցել:

Հանդիպումից հետո կողմերը նախատեսում են մամուլի ասուլիս հրավիրել:

Սպասվում է, որ կողմերը կքննարկեն Սիրիայում և Իրաքում տեղի ունեցող զարգացումները: Խոսվելու է նաև իրաքյան Քուրդիստանում սեպտեմբերի 25-ին տեղի ունեցած հանրաքվեի հարցի մասին, որը երկու երկրները չեն ճանաչում:

Ջիհանգիրիի դիմավորման արարողությանը ներկա են եղել Թուրքիայի էկոնոմիկայի նախարար Նիհաթ Զեյբեքչին, տրանսպորտի, կապի և ծովագնացության նախարար Ահմեթ Արսլան, փոխարտգործնախարար Ումիթ Յալչինը, ներքին գործերի նախարարության խորհրդականներից Մուհթերեմ Ինջեն: Ներկա է եղել նաև Թուրքիայի կենտրոնական բանկի (TCMB) նախագահ Մուրաթ Չեթինքայան:

Աղբյուրը հավելում է, որ իրանցի պաշտոնյան մասնակցելու է հոկտեմբերի 20-ին Ստամբուլում կայանալիք D-8 (Իսլամական ութնյակ) կազմակերպության գագաթնաժողովին:

Նշենք, որ 1996թ. հիմնադրված D-8-ի անդամներն են Թուրքիան, Իրանը Ինդոնեզիան, Բանգլադեշը, Պակիստանը, Մալազիան, Նիգերիան և Եգիպտոսը:

Աղբյուր` Ermenihaber.am