Թալալ Սիլոն մանրամասներ է ներկայացրել ԱՄՆ-ի և Սիրիայի քրդերի համագործակցության մասին

Տարածաշրջան10:25, 04 Դեկտեմբեր 2017

Թալալ Սիլոն մանրամասներ է ներկայացրել ԱՄՆ-ի և Սիրիայի քրդերի համագործակցության մասին

«Սիրիայի դեմոկրատական ուժեր» (SDF) կազմակերպության նախկին խոսնակ ազգությամբ թուրքմեն Թալալ Սիլոն, որը նոյեմբերի 13-ին հանձնվել էր Թուրքիային, որոշ մանրամասներ է ներկայացրել ԱՄՆ-ի և Սիրիայի քրդական ուժերի համագործակցության մասին։ Ըստ թուրքական «Anadolu» լրատվական գործակալության՝ Սիլոն պնդել է, թե ամերիկացիները Սիրիայի քրդական YPG-ին զինում էին SDF-ի միջոցով։

Նրա խոսքերով՝ ամերիկացիները Սիրիայի քրդական ուժերի վերահսկողության տակ գտնվող Դիրբիսիե շրջանում հիմնել են ռազմաբազա, որտեղից էլ SDF և մնացած քրդական ուժերը զենք են ստանում։ Ռազմաբազայում հիմնականում տեղակայված են ռազմական ուղղաթիռներ։ Որոշ ժամանակ անց ամերիկացիները Սիրիայի քրդերի վերահսկողության տակ գտնվող մեկ այլ ՝Չելեբիյե շրջանում հիմնել էին ևս մի ռազմաբազա, որտեղից նույնպես զենք էր մատակարարվում։

«Երբ ԱՄՆ-ի նախագահ դարձավ Դոնալդ Թրամփը, քրդերի և ամերիկացիների միջև համագործակցությունը ավելի խորացավ»,- նշել է Սիլոն։ Թեև ԱՄՆ-ն պաշտոնապես նշում է, որ այդ զենքերը տրամադրվում են SDF—ին, այնուամենայնիվ դրանք փոխանցվում են նաև YPG-ին։

Սիլոն նաև խոստովանել է, որ ամերիկացիները քրդերի վերահսկողության տակ գտնվող տարածքներում բացել էին հատուկ կենտրոններ, որտեղ բժշկական օգնություն էր տրամադրվում քրդերին։ Մասնավորապես այդտեղ էին այցելում տարբեր բժիշկներ Ֆրանսիայից և ԱՄՆ-ից և վիրահատում վիրավոր քուրդ զինյալներին։

Սիլոն նշել է, որ այս պահին Սիրիայի տարածքներում կա 2 հազար ամերիկացի զինվոր:

Աղբյուր` Ermenihaber.am