Թուրքիայի և Ռուսաստանի նախագահները հանդիպել են

Տարածաշրջան05:10, 12 Դեկտեմբեր 2017

Թուրքիայի և Ռուսաստանի նախագահները հանդիպել են

Դեկտեմբերի 11-ին Թուրքիա մեկնած Ռուսաստանի նախագահ Վլադիմիր Պուտինը հանդիպել է Թուրքիայի նախագահ Ռեջեփ Թայիփ Էրդողանի հետ։

Թուրքական «Gercekgundem» լրատվակայքի հաղորդմամբ՝ հանդիպումից հետո նախագահները Անկարայում մամուլի ասուլիս են տվել, որի ժամանակ տեղեկացրել են, թե ինչ հարցեր են քննարկել։

Թուրքիայի նախագահը մասնավորապես նշել է, որ Պուտինի հետ բացի ռուս-թուրքական հարաբերություններից քննարկվել է նաև մի շարք տարածաշրջանային խնդիրներ, մասնավորապես՝ Երուսաղեմի շուրջ ստեղծված իրավիճակը և Սիրիայի հարցը։

Էրդողանը անպատասխանատու քայլ է որակել Դոնալդ Թրամփի՝ Երուսաղեմը Իսրայելի մայրաքաղաք ճանաչելը։ Թուրքիայի նախագահը նաև քննադատել է Իսրայելի հրթիռակոծությունները Գազայի հատվածում։

Էրդողանը շեշտել է, որ հանդիպման ժամանակ քննարկվել է Սիրիայի հակամարտության կարգավորման հարցը։ Այն նպատակով նա կարևորել է Ժնևում Սիրիայի հարցով տեղի ունենալիք համաժողովը։ Թուրքիայի նախագահը նշել է, որ առաջիկայում կրկին Սոչիում հանդիպում է ունենալու Պուտինի հետ, որի ժամանակ կքննարկվի գլխավորապես Սիրիայի հարցը։

Վերջում Էրդողանը խոսելով «S-400» ՀՕՊ համակարգերի մատակարարման վերաբերյալ, ասել է․

«Ուզում եմ տեղեկացնել, որ «S-400»-ների վերաբերյալ մեր ընկերները կիրականացնեն համապատասխան աշխատանքներ և այս շաբաթվա ընթացքում այդ գործը կփակեն»։

Աղբյուր` Ermenihaber.am