ERMENI HABER AJANSI

Թուրքական «Ռոքեթսան» (Roketsan) ռազմաարդյունաբերական ընկերությունը սկսում է հարվածային անօդաչու թռչող սարքերի (ԱԹՍ) համար նախատեսված «MAM-C» անունով նոր մինի հրթիռների սերիական արտադրությունը: Հրթիռները հանդիսանում են թուրքական «Աթաք» (Atak) ռազմական ինքնաթիռների վրա տեղադրվող «Ջիրիթ» (Cirit) հրթիռների նոր մոդիֆիկացիան: Դրանք հարմարեցվել են հարվածային ԱԹՍ-ներից կիրառման համար:

Նշվում է, որ «MAM-C» խելացի մինի հրթիռները նախատեսված են ոչ մեծ շինությունների, ոչ զրահապատ տեխնիկայի, ռադարների ալեհավաքների, կրակակետերի ոչնչացման համար: Մինի հրթիռը կարող է ոչնչացնել նաև 25 մ լայնությամբ տեղակայված կենդանի ուժ:

Ինքնանշանառման լազերային գլխիկի շնորհիվ «MAM-C»-ն ունի բավական բարձր հարվածային ճշգրտություն: Հրթիռի ճշգրիտ նշանառության օգնում են նաև նրա թևերը:

Անօդաչուների վրա կարող է տեղադրվել 2-ից մինչև 6 մինի հրթիռ: Նշվում է, որ հրթիռները կարող են տեղադրվել նաև «Hürküş» թեթև հարվածային ինքնաթիռների վրա: