Հարձակում թուրքական նորաստեղծ կուսակցության անդամների վրա (լուսանկարներ)

Տարածաշրջան12:58, 07 Մայիս 2018

Հարձակում թուրքական նորաստեղծ կուսակցության անդամների վրա (լուսանկարներ)

Ստամբուլի Բաղջըլար թաղամասում մի խումբ մարդիկ դանակներով հարձակվել են թուրքական նորաստեղծ «İYİ» կուսակցության անդամների վրա։ Հարձակման հետևանքով 6 կուսակցական վիրավորվել է։

Ոստիկանության կողմից սկսված հետաքննության շրջանակներում 8 հոգի բերման է ենթարկվել։

Տեղի ունեցածը դատապարտել է կուսակցության կին նախագահ Մերալ Աքշեները: Նա պատրաստվում է մասնակցել Թուրքիայի արտահերթ նախագահական ընտրություններին։ Նշել է, որ այս հարձակմամբ իրենց հնարավոր չէ վախեցնել։

Թեմայի վերաբերյալ խոսել է նաև «İYİ» կուսակցության փոխնախագահ Մուսավաթ Դերվիշօղլուն։ Վերջինս կատարվածի մեջ մեղադրել է Թուրքիայի «Ազգայնական շարժում» կուսակցության (ԱՇԿ-MHP) նախագահ Դևլեթ Բահչելիին։

Հիշեցնենք, որ Մերալ Աքշեները նախկինում եղել է MHP-ի անդամ։ Նա զբաղեցրել է Թուրքիայի ներքին գործերի նախարարի, ինչպես նաև մեջլիսի փոխխոսնակի պաշտոնները: Հեռանալով MHP-ից ՝ նա հիմնեց «İYİ » կուսակցությունը: Նրա քաղաքական ուժին միանալու պատրաստակամություն հայտնեցին MHP-ի մի շարք անդամներ, որի հետևանքով վերջինիս շարքերը նոսրացան։