Թուրքիայի դրոշով F-35 կործանիչները փորձնական թռիչքներ են իրականացնում (տեսանյութ)

Տարածաշրջան08:37, 23 Մայիս 2018

Թուրքիայի դրոշով F-35 կործանիչները փորձնական թռիչքներ են իրականացնում (տեսանյութ)

Շրջանառվում են լուրեր, թե թուրք-ամերիկյան լարված հարաբերությունների պատճառով Վաշինգտոնը կարող է Թուրքիային չմատակարարել «F-35A» տիպի նոր սերնդի ամերիկյան կործանիչներ, բայց համացանցում հայտնվել է տեսանյութ, որը կասկածի տակ է դնում այդ լուրերը:

Թուրքիայի պաշտպանության նախարարությանն առընթեր ռազմարդյունաբերության քարտուղարությունը հրապարակել է տեսանյութ, որտեղ երևում է, թե ինչպես Թուրքիայի պետական դրոշով «F-35A» ինքնաթիռները փորձնական թռիչքներ են իրականացնում ամերիկյան «Lockheed Martin» ընկերության անգարներից։

Հունիսի 21-ին նախատեսված է առաջին 2 ինքնաթիռների փոխանցումը Թուրքիային։ Թուրքական կողմը նախատեսում է գնել 100 հատ «F-35»։ Առաջին փուլում, սակայն, կգնի միայն 30-ը։

Թուրքիայի զինված ուժերը տեղի ռազմարդյունաբերական ընկերությունների միջոցով պիտի ստեղծեն «F-35» կործանիչների վրա տեղադրված շարժիչների սպասարկման և վերանորոգման կենտրոններ։ Իսկ թուրք օդաչուները պիտի հատուկ պատրաստություն անցնեն, նախքան ինքնաթիռների շահագործումը։ Ինքնաթիռները Թուրքիայի կողմից կսկսեն շահագործվել 2019թ. աշնանը։

Հիշեցնենք, որ ամերիկյան «Lockheed Martin» ընկերությունը նախագծել է F-35 կործանիչի 3 մոդիֆիկացիա` F-35A, F-35B և F-35C։