Վաշինգտոնը հույս ունի, որ Թուրքիան ձեռք չի բերի ռուսական ՀՕՊ համակարգերը

Տարածաշրջան05:29, 24 Մայիս 2018

Վաշինգտոնը հույս ունի, որ Թուրքիան ձեռք չի բերի ռուսական ՀՕՊ համակարգերը

ԱՄՆ-ի պետքարտուղար Մայք Պոմպեոն մասնակցել է ներկայացուցիչների պալատի արտաքին հարաբերությունների հարցերով զբաղվող հանձնաժողովի նիստին, որի ընթացքում խոսել է Թուրքիա-ՆԱՏՕ հարաբերությունների, «S-400» ՀՕՊ համակարգերի և «F-35» ռազմական ինքնաթիռների հարցի մասին։

Թուրքիայի կողմից ռուսական «S-400»-ները գնելու վերաբերյալ, պետքարտուղարը մասնավորապես ասել է.

«Մենք շարունակելու ենք աշխատանքներ իրականացնել, որպեսզի Թուրքիան Ռուսաստանից չգնի S-400 ՀՕՊ համակարգերը։ Դա դեռևս տեղի չի ունեցել և հույս ունենք, որ տեղի չի էլ ունենա»։

Պետքարտուղարը խոսել է նաև ամերիկյան արտադրության «F-35» նոր սերնդի ռազմական ինքնաթիռների շուրջ ստեղծված խնդրի մասին, որոնք պաշտոնական Անկարան պատրաստվում է գնել ԱՄՆ-ից։

ԱՄՆ-ում համարում են, որ այդ գործարքը կարող է չեղարկվել թուրք-ամերիկյան լարված հարաբերությունների պատճառով։

Պոմպեոն ասել է, որ ամերիկյան ղեկավարությունը դեռևս վերջնական որոշում չի կայացրել նոր սերնդի այդ ինքնաթիռները Թուրքիային մատակարարելու հարցում:

Չնայած Թուրքիայից եկող բոլոր սպառնալիքներին, թե անհրաժեշտության դեպքում Թուրքիան դուրս կգա ՆԱՏՕ-ից, այնուամենայնիվ, ամերիկացի պաշտոնյան իրատեսական չի համարում դա։ Նա շեշտել է, որ Թուրքիան պետք է հավատարիմ մնա ՆԱՏՕ-ի սկզբունքներին և քայլեր ձեռնարկի, որ դաշնակցային հարաբերությունները չտուժեն։

Աղբյուր` Sputnik.com.tr