Թուրքիան Սուլեյման շահի դամբարանը Սիրիա է տեղափոխում

Տարածաշրջան07:43, 06 Հունիս 2018

Թուրքիան Սուլեյման շահի դամբարանը Սիրիա է տեղափոխում

Սիրիայի Մանբիչ քաղաքի շուրջ Անկարայի և Վաշինգտոնի միջև պայմանավորվածության շրջանակում Թուրքիան Սիրիա է տեղափոխելու Օսմանյան կասյրության առաջին սուլթան Օսման 1-ի պապի՝ Սուլեյման Շահի դամբարանը։

2015թ., երբ Սիրիայում թեժ մարտեր էին ընթանում «Իսլամական պետություն» (ԻՊ) ահաբեկչական կազմակերպության դեմ, Թուրքիայի զինուժին պատկանող ստորաբաժանումները ներխուժել էին Սիրիայի Էշմե գյուղ և անվտանգության նկատառումներից ելնելով ժամանակավորապես տարհանել էին այնտեղ գտնվող Սուլեյման շահի դամբարանը։ Սուլեյման Շահի մասունքները տեղափոխվել էին Թուրքիայի տարածք։

2018թ. ապրիլին Թուրքիայի արտգործնախարարը տեղեկացրել էր, որ այն բանից հետո, երբ Սիրիայում իրավիճակը հանդարտվի, Թուրքիան շահի դամբարանը հետ կտեղափոխի Սիրիա։

Սուլեյման շահը ապրել է 1178-1227 թվականներին։ Մահից հետո թաղվել է Սիրիայի Հալեպ շրջանում։ Նրա դամբարանը հետագայում թուրքերի համար վերածվել է սրբավայրի։ 1921թ.-ին Ֆրանսիայի և Թուրքիայի միջև կնքված Անկարայի պայմանագրով դամբարանի վերահսկողությունը անցել է Թուրքիային։

Հիշեցնենք, որ Վաշինգտոնի և Անկարայի միջև ձեռբերված համաձայնությամբ Թուրքիայի կողմից ահաբեկչական համարվող Սիրիայի քրդական ուժերը պետք է դուրս գան Մանբիչից։