Թուրքիայի ցամաքային ուժերը մոտեցել են Մանբիչի մատույցներին

Տարածաշրջան13:13, 18 Հունիս 2018

Թուրքիայի ցամաքային ուժերը մոտեցել են Մանբիչի մատույցներին

Թուրք-ամերիկյան պայմանավորվածության շրջանակներում հունիսի 18-ին Թուրքիայի զինուժը մոտեցել է Սիրիայի Մանբիչ քաղաքի մատույցներին։ Մանբիչը գտնվում է Սիրիայի քրդական ուժերի վերահսկողության տակ:

Այս պահի դրությամբ թուրք զինվորներն իրենց վերահսկողության տակ են վերցրել Մանբիչի հարակից շրջանները և պատրաստվում են ներխուժել քաղաք։

Մինչև Մանբիչի մատույցներին հասնելը Թուրքիայի զինուժի գլխավոր շտաբի պետ, բանակի գեներալ Հուլուսի Աքարը հեռախոսազրույց է ունեցել ՆԱՏՕ-ի դաշնակցային ուժերի հրամանատարի հետ:

Տեղեկությունը հաստատվել է նաև Թուրքիայի նախագահի և վարչապետի կողմից։

Հիշեցնենք, որ թուրքական և ամերիկյան կողմերը Վաշինգտոնում հունիսի 4-ին համաձայնության էին եկել քրդերի վերահսկողության տակ գտնվող Մանբիչի վերաբերյալ։ Կողմերը քննարկել էին այն ճանապարհային քարտեզը, որը նախատեսում էր քրդական ուժերի դուրսբերումը Մանբիչից։ Կողմերի միջև ձեռք էր բերվել պայմանավորվածություն նաև այն մասին, որ Սիրիայի քրդական ուժերից ետ վերցվեն ԱՄՆ-ի տրամադրած զենքերը:, Դրանք քրդերին հատկացվել էին «Իսլամական պետություն» (ԻՊ) ահաբկեչական կազմակերպության դեմ պայքարելու նպատակով։

Աղբյուր` Time turk