Թուրքիայում ընդդիմադիր կուսակցությունների անունից կեղծ թռուցիկներ են տարածվել

Քաղաքական12:14, 22 Հունիս 2018

Թուրքիայում ընդդիմադիր կուսակցությունների անունից կեղծ թռուցիկներ են տարածվել

Հունիսի 24-ին Թուրքիայում կայանալիք խորհրդարանական և նախագահական արտահերթ ընտրություններից առաջ ընդդիմադիր կուսակցությունների անուններից կեղծ գրքույկներ են տարածվում:

Ընտրություններից 2 օր առաջ Անկարայի փողոցներում անհայտ անձնանց կողմից տարածվել են թռուցիկներ, որոնք իբր պատկանում են Թուրքիայի ընդդիմադիր քեմալական «Ժողովրդահանրապետական» (CHP-ԺՀԿ), քրդամետ «Ժողովուրդների դեմոկրատական» (ԺԴԿ-HDP) և «İYİ» կուսակցություններին:

Այդ թռուցիկներ միջոցով վերոնշյալ կուսակցությունների անունից տարածվել են ստահոդ ուղերձներ:

Օրինակ՝ HDP-ին վերագրվող թռուցիկում գրված է եղել. «Ինչո՞ւ մեր հարավում չստեղծվի քրդական պետություն: Թող Թուրքիայի զինված ուժերը դուրս գան Մանբիչից և Աֆրինից»:

CHP-ի թռուցիկում Թուրքիայի նախագահի թեկնածու Մուհարրեմ Ինջեի անունից ասվում է. «Հենց մենք գանք իշխանության, վերջ կտանք գլխաշոր հագնելուն»:

Իսկ նորաստեղծ «İYİ» կուսակցության թռուցիկում պատկերված ծաղրանկարով նախագահ Մերալ Աքշեներին նմանեցվում է ամերիկաբնակ միլիարդատեր, իսլամի քարոզիչ Ֆեթթուլահ Գյուլենի հետ, ով Անկարայի կողմից մեղադրվում է 2016թ. հուլիսի 15-ի ռազմական հեղաշրջման փորձը նախաձեռնելու մեջ:

Աղբյուր` Demokrathaber