Թուրք օդաչուները սկսում են ուսումնական թռիչքներ կատարել F-35-երով

Տարածաշրջան07:49, 04 Հուլիս 2018

Թուրք օդաչուները սկսում են ուսումնական թռիչքներ կատարել F-35-երով

Թուրք օդաչուներն ԱՄՆ-ի Արիզոնա նահանգի Լյուք ավիաբազայում սկսել են ուսումնական թիռիչքներ կատարել F-35 ռազմական ինքնաթիռներով:

ԱՄՆ-ն հունիսի 21-ին ներկայացրել էր Թուրքիային տրամադրվելիք 2 F-35 կործանիչները, որոնք ԱՄՆ-ում կմնան մինչև թուրք օդաչուների վերապատրաստման ավարտը:

Ուսումնական նպատակով Արիզոնա է մեկնել 13 օդաչու և 325 հոգուց բաղկացած սպասարկող անձնակազմ, որի մեջ կան բարձրաստիճան պաշտոնյաներ, ինչպես նաև ինժեներներ։ Թուրքական պատվիրակությունը գլխավորում է գնդապետ Զիյա Քաբասաքալը։

Վերապատրաստման ընթացքում թուրք օդաչուները ոչ միայն ուսումնական թռիչքներ կիրականանցնեն, այլև կծանոթանան F-35-ների տեխնիկական հնարավորություններին և տեխնոլոգիաներին։

Նրանք ԱՄՆ-ում կմնան մոտ 1 տարի, որից հետո կվերադառնան Թուրքիա և իրենց փորձը կփոխանցեն ուրիշներին։ Արդեն հայտնի է, որ այդ երկու ինքնաթիռները Թուրքիայում տեղեկայվելու են Մալաթիա նահանգի Աքչադաղ շրջանի 7-րդ ավիաբազայում:

Հիշեցնեք, որ ըստ թուրք-ամերիկյան պայմանագրի` Թուրքիան պետք է ստանա ընդհանուր 100 հատ F-35, բայց մնացած 98-ի ճակատագիրը առայժմ հայտնի չէ, քանի որ վերջերս թուրք-ամերիկյան լարված հարաբերությունների պատճառով ԱՄՆ-ի սենատը վավերացրեց Թուրքիայի դեմ պատժամիջոցներ սահմանող օրինագիծ: Օրինագծում պահանջվում էր, որ Թուրքիան հրաժարվի ռուսական S-400 ՀՕՊ համակարգերի ձեռքբերումից, հակառակ դեպքում Վաշինգտոնը կդադարեցնի F-35-երի և մի շարք այլ զինտեխնիկայի մատակարարումը պաշտոնական Անկարային:

Աղբյուր` A haber