Թուրքիայի նոր կառավարության ձևավորումից հետո թուրքական լիրան արժեզրկվել է

Տնտեսական10:10, 10 Հուլիս 2018

Թուրքիայի նոր կառավարության ձևավորումից հետո թուրքական լիրան արժեզրկվել է

Թուրքիան արդեն պաշտոնապես անցում կատարեց պետական կառավարման նախագահական համակարգին։ Հուլիսի 9-ին տեղի ունեցած երդմնակալության արարողությանը հաջորդեց նոր կառավարության կազմի հրապարակումը։ Այս ներքաղաքական զարգացումներն ուղեկցվեցին թուրքական լիրայի փոխարժեքի կտրուկ անկմամբ։

Այսպես, կառավարության կազմի հրապարակումից հետո ԱՄՆ դոլարի փոխարժեքը թուրքական լիրայի նկատմամբ աճեց շուրջ 4 տոկոսով՝ օրվա վերջում հասնելով 1 դոլար/4.75 լիրա հարաբերակցության։ Մինչև կառավարության կազմի հրապարակումը դոլարի փոխարժեքը 4․58 լիրա էր։

Հուլիս 10-ի վաղ առավոտյան դոլար / լիրա հարաբերակցությունը 1 / 4․72 էր։

Իսկ եվրոյի փոխարժեքը հուլիսի 9-ի երեկոյան հատել էր 5․57 լիրայի սահմանը, իսկ հուլիսի 10-ի առավոտյան մի փոքր զիջել է դիրքերը և հասել 5․55 լիրայի։

Հիշեցնենք, որ Թուրքիայի նոր կառավարությունում գանձապետարանի և ֆինանսների նախարարի պաշտոնում նշանակվել է Էրդողանի փեսան՝ Բերաթ Ալբայրաքը, իսկ նախկին կառավարությունների կազմում ֆինանսների և էկոնոմիկայի ոլորտները ղեկավարած Մեհմեթ Շիմշեքը, Նաջի Աղբալը, Նիհաթ Զեյբեքչին և Լյութֆի Էլվանը նոր կառավարությունում տեղ չեն գտել։

Աղբյուր` Sputnik