Էրդողան. «Կիպրոսի հիմնախնդիրը մեր ազգային հարցն է»

Տարածաշրջան08:00, 11 Հուլիս 2018

Էրդողան. «Կիպրոսի հիմնախնդիրը մեր ազգային հարցն է»

Թուրքիայի նախագահ Ռեջեփ Թայիփ Էրդողանն Ադրբեջան կատարած այցից հետո անմիջապես մեկնել է Հյուսիսային Կիպրոսի թուրքական ինքնահռչակ հանրապետություն։

Այնտեղ Էրդողանը հանդիպել է Հյուսիսային Կիպրոսի թուրքական ինքնահռչակ հանրապետության նախագահ Մուստաֆա Աքընջըի և մի շարք այլ բարձրաստիճան պաշտոնյաների հետ։

Էրդողան-Աքընջը հանդիպումից հետո կողմերը մամուլի ասուլիս են տվել։ Թուրքիայի նախագահի խոսքերով` քննարկվել են մի շարք օրակարգային թեմաներ, այդ թվում նաև Կիպրոսի հիմնախնդիրը։

«Մենք միշտ կանգնել ենք Կիպրոսի թուրքերի կողքին և այդպես էլ շարունակելու ենք։ Կիպրոսը մեր ազգային հարցն է։ Մեր նպատակն է արդար և մնայուն լուծում գտնել Կիպրոսի հիմնախնդրում»,-ասել է Էրդողանը։

Վերջինս նշել է, որ Թուրքիան 50 տարի ջանքեր է գործադրում խնդրի կարգավորման համար, սակայն մինչև օրս դրական որևէ արդյունք չի արձանագրվել։ Նա նկատել է տվել, որ 1 տարի առաջ Կիպրոսի հիմնախնդրով հրավիրված կոնֆերանսը նույնպես որևէ արդյունք չի տվել։

Թուրքիայի նախագահը նաև նշել է, որ հիմնախնդրի չլուծման հիմնական պատճառներից մեկն այն է, որ «Կիպրոսի հունական հատվածում ապրող հույները համարում են, որ կղզու հիմնական տերերն իրենք են»։

Տեղեկացնենք, որ Էրդողանը նախագահ վերընտրվելուց հետո իր առաջին պաշտոնական այցերը կատարել է Ադրբեջան և Հյուսիսային Կիպրոսի թուրքական ինքնահռչակ հանրապետություն։

Աղբյուր` CnnTürk