Իրանը շատ լուրջ սպասելիքներ ունի Թուրքիայից

Տարածաշրջան10:22, 08 Օգոստոս 2018

Իրանը շատ լուրջ սպասելիքներ ունի Թուրքիայից

«Տնտեսական համագործակցության կազմակերպության» (ՏՀԿ-ECO) գլխավոր քարտուղար, Իրանում Թուրքիայի արտակարգ և լիազոր դեպսան Իբրահիմ Աքչան հայտնել է, որ Իրանը շատ լուրջ սպասելիքներ ունի Թուրքիայից ԱՄՆ-ի կողմից Իրանի նկատմամբ վերսկսված տնտեսական պատժամիջոցների հաղթահարման հարցում:

Իրանի մայրաքաղաք Թեհրանում ՏՀԿ-ի կենտրոնական գրասենյակում ելույթ ունենալիս՝ Աքչան ներկայացրել է, թե ինչպես են Իրանի նկատմամբ ԱՄՆ կիրառած սահմանափակումներն ազդել Թուրքիա-Իրան հարաբերությունների վրա:

«Այս իմաստով իրանցիները շատ լուրջ սպասելիքներ ունեն: Նախկինում, երբ Իրանի նկատմամբ էմբարգո (արգելք) էր կիրառվում, մեծ ակնկալիքներ կային Թուրքիայից: Առաջիկայում ևս կրկին որոշակի հույսեր կկապվեն Թուրքիայի հետ»:

Աքչան նաև նշել է, որ Իրանի տնտեսությունը ծայրաստիճան խոցելի վիճակում է: Եվ քանի որ Իրանն ինտենսիվ տնտեսական կապեր ունի ՏՀԿ անդամ երկրների հետ, ուստի այդ երկրներին նույնպես անհանգստացնում է առկա վիճակը:

ՏՀԿ-ի կենտրոնական գրասենյակում տեղի ունեցած արարողության ժամանակ ՏՀԿ-ի գլխավոր քարտուղարի պաշտոնը փոխանցվել է Իրանը ներկայացնող Հադի Սյուլեյմանփուրին:

Հիշեցնենք, որ Թուրքիայի, Իրանի և Պակիստանի կողմից 1985թ. հիմնադրված ՏՀԿ-ի անդամների թիվը Խորհրդային միության փլուզումից հետո Աֆղանստանի, Ադրբեջանի, Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի մասնակցությամբ հասել է 10-ի: