Էրդողանի կուսակցությունն արձագանքել է Հունաստանի Գերագույն դատարանի որոշմանը

Տարածաշրջան10:00, 22 Օգոստոս 2018

Էրդողանի կուսակցությունն արձագանքել է Հունաստանի Գերագույն դատարանի որոշմանը

Թուրքիայում իշխող «Արդարություն և զարգացում» կուսակցության (AKP-ԱԶԿ) խոսնակ Օմեր Չելիքն անդրադարձել է Թուրքիայում 2016թ. հուլիսի 15-ի հեղաշրջման փորձի մեջ մեղադրվող թուրք զինվորականներին Հունաստանի Գերագույն դատարանի կողմից ապաստան տալու որոշմանը:

Չելիքն այդ առնչությամբ հանդես է եկել հայտարարությամբ.

«Հունական արդարադատությունը հերթական սկանդալային որոշման տակ դրեց իր ստորագրությունը: Սա ցույց է տալիս, որ այլ նպատակներ է հետապնդում: Հունաստանի դատական մարմինների կողմից հեղաշրջման մասնակիցներին հովանու տակ առնելուն միտված որոշումների ընդունումը փաստում է այն, որ իրավունքն ու իրավագիտությունն ամբողջովին անտեսվում են:

Հունական արդարադատությունն իր կայացրած որոշմամբ փաստորեն կանգնեց Թուրքիայի թշնամիների կողքին: Սա ահաբեկչությանն աջակցելուց շատ ավելի ծանր և ամոթալի կեցվածք է: Ահաբեկիչներին զենքով աջակցողներին և հեղաշրջման մասնակիցներին դատական որոշումներով իրենց հովանու տակ առնողներին երբեք չենք մոռանալու»:

Հիշեցնենք, որ ավելի վաղ Հունաստանի Պետական խորհուրդը, որը երկրում գործող 3 գերագույն դատարաններից մեկն է, մերժել էր կառավարության առարկությունը և որոշում ընդունել հուլիսի 15-ին Թուրքիայում հեղաշրջման փորձից հետո Հունաստան փախած զինվորականներին ապաստան տալու վերաբերյալ:

Աղբյուր` Haberler.com