Չավուշօղլուն՝ ԱՄՆ-ին. «S-400»ներից հրաժարվելու դեպքում մեզ երաշխավորո՞ւմ եք «Patriot»-ի վաճառքը

Քաղաքական13:58, 28 Օգոստոս 2018

Չավուշօղլուն՝ ԱՄՆ-ին. «S-400»ներից հրաժարվելու դեպքում մեզ երաշխավորո՞ւմ եք «Patriot»-ի վաճառքը

Թուրքիայի արտգործնախարար Մևլութ Չավուշօղլուն արձագանքել է ամերիկացի կոնգրեսականների՝ «Ս-400» ՀՕՊ համակարգերից հրաժարվելու մասին Թուրքիային ուղղված կոչին: Լիտվիայի ԱԳ նախարարի հետ հանդիպմանը հաջորդած համատեղ մամուլի ասուլիսին ունեցած ելույթի ժամանակ Չավուշօղլուն նշել է, որ ինքը, որպես Թուրքիայի ԱԳ նախարար, կողմ է խնդիրները դիվանագիտական ճանապարհով լուծելուն: Այդ համատեքստում վերջինս դրական է գնահատել հարաբերությունները կարգավորելու նպատակով ԱՄՆ-ի կոնգրեսի պատվիրակության ժամանումը Թուրքիա:

Չավուշօղլուն հայտարարել է, որ այդ հարաբերությունները կարևոր են իրենց համար, սակայն դրանք զարգացնելու համար պետք է հրաժարվել սպառնալիքի լեզվից և դադարեցնել անընդունելի նախապայմաններ դնելը:

«Այժմ մենք ՀՕՊ համակարգերի հրատապ պահանջ ունենք: Ի դեմս ԱՄՆ-ի՝ մենք ցանկանում էինք այդ ՀՕՊ համակարգերը գնել մեր դաշնակիցներից: Սակայն դաշնակից երկրները չկարողացան կամ չցանկացան մեզ վաճառել դրանք:

ԱՄՆ-ը «Պատրիոտ» համակարգելը մեզ վաճառելու երաշխիքներ տալի՞ս է: Նույնիսկ «F-35» կործանիչների վաճառքի կասեցումով է մեզ ամեն օր սպառնում: Անդադար նախապայմաններ է առաջ քաշում: Բայց ես էլ պետք է իմ երկրի օդային պաշտպանությունն ապահովեմ: Բոլորի զինանոցներում հրթիռներ կան: Ես էլ պետք է ՀՕՊ համակարգեր գնեմ: Ես դա պարտադրված եմ անում, այլ ոչ թե՝ նաընտրությունից ելնելով»,- ասել է Չավուշօղլուն:

Անդրադառնալով ԱՄՆ-ի կողմից Թուրքիային «F-35» կործանիչները տրամադրելու հետաձգմանը՝ Չավուշօղլուն հայտարարել է, որ կործանիչների արտադրությունը բազմակողմ նախագծի արդյունք է և Թուրքիան այդ նախագծի լիիրավ կողմ է հանդիսանում:

«ԱՄՆ-ի ցանկությամբ Թուրքիային նախագծից հանելը սխալ մոտեցում է, վերջիվերջո միջազգային իրավունք գոյություն ունի»,- եզրափակել է թուրք նախարարը:

Աղբյուր` Hurriyet