Բելառուսը և Թուրքիան ցանկանում են առևտուրն իրականացնել ազգային արժույթներով

Տնտեսական09:08, 05 Սեպտեմբեր 2018

Բելառուսը և Թուրքիան ցանկանում են առևտուրն իրականացնել ազգային արժույթներով

Բելառուսը մտադիր է Թուրքիայի հետ արտաքին առևտուրն իրականացնելիս հրաժարվել ամերիկյան դոլարից: Այս մասին հայտարարել է Թուրքիայում Բելառուսի դեսպան Անդրեյ Սավինիխն Անկարայի առևտրի պալատի հետ համատեղ կազմակերպված «Բելառուսի հետ առևտրի և ներդրումների հեռանկարները» թեմայով ֆորումի ժամանակ:

«Թուրքիան և Բելառուսը այսուհետև միմյանց հետ առևտուր իրականացնելիս ցանկանում են անցում կատարել ազգային արժույթներին: Այս փոփոխությունը դրական կանդրադառնա առևտրային հարաբերությունների վրա: Մենք ցանկանում ենք անցնել թուրքական լիրայի և բելառուսական ռուբլու»,- ասել է դեսպանը:

Սավինիխը նշել է, որ երկու երկրների առևտրական կապերը շատ ակտիվ են՝ տեղեկացնելով, որ 2018-ի 1-ին եռամսյակում 2 երկրի միջև առևտրաշրջանառության ծավալը կազմել է 530 մլն դոլար, որը տարեվերջին կանցնի 1 միլիարդի սահմանը:

Դեսպանը տեղեկացրել է նաև, որ այս պահին 2 կողմն էլ նոր տնտեսական մոդելի վրա է աշխատում, որը նախատեսում է վերացնել երկկողմանի առևտուրը սահմանափակող կամ դրա զարգացումը դանդաղեցնող բոլոր խոչընդոտները:

Հիշեցնենք, որ Թուրքիայի նախագահ Ռեջեփ Թայիփ Էրդողանը իր երկրի բոլոր խոշոր առևտրային գործընկերներին բազմիցս կոչ է արել համատեղ առևտուրն իրականացնել ազգային արժույթներով: Թուրքիայի հետ երկողմանի առևտուրը դոլարով իրականացնելուց հրաժարվելու մասին արդեն իսկ հայտարարել են Իրանը, Ռուսաստանն ու Ադրբեջանը:

Աղբյուր` Haberler