Թուրքիան Հոլանդիայում նոր դեսպան ունի

Քաղաքական12:32, 07 Սեպտեմբեր 2018

Թուրքիան Հոլանդիայում նոր դեսպան ունի

Շաբան Դիշլին նշանակվել է Հոլանդիայում Թուրքիայի արտակարգ և լիազոր դեսպան։

Նշանակումը տեղի է ունեցել թուրք-հոլանդական հարաբերությունների կարգավորման շրջանակներում։ Հարաբերությունները կարգավորելու որոշումը կայացվել էր Թուրքիայի և Հոլանդիայի արտգործնախարարների՝ ավելի վաղ տեղի ունեցած հանդիպման ժամանակ։

Լարվածության պատճառով Հոլանդիան և Թուրքիան ժամանակավորապես հետ էին կանչել իրենց դեսպաններին։

Թուրքիայի արտգործնախարարությունը հույս հայտնել, որ դա դրականորեն կանդրադառնա Հոլանդիայի հետ հարաբերություններում, որոնք ավելի քան 400 տարվա պատմություն ունեն։

Նշվել է, որ հաջորդ քայլը, որն օգնելու է թուրք-հոլանդական հարաբերությունների կարգավորմանը, հոկտեմբերին Հոլանդիայի արտգործնախարարի պաշտոնական այցն է Թուրքիա։

Աղբյուրը նշում է, որ նշանակված դեսպան Դիշլին համարվում է Թուրքիայում իշխող «Արդարություն և զարգացում» (ԱԶԿ-AKP) կուսակցության հիմնադիրներից մեկը։ Նախկինում եղել է ԱԶԿ-ի Սաքարյա նահանգի պատգամավորը։

Հիշեցնենք, որ լարվածության գլխավոր պատճառն այն էր, որ 2017-ի մարտի սկզբին Նիդերլանդներում բնակվող թուրք ընտրողների հետ հանդիպման նպատակով այդ երկիր էին մեկնել Թուրքիայի արտգործնախարար Մևլութ Չավուշօղլուն ու ընտանեկան հարցերի և սոցիալական ապահովության նախկին նախարար Ֆաթմա Քայան: Սակայն նրանց թույլ չէր տրվել անգամ մուտք գործել Նիդերլանդներ: Այցի նպատակն էր 2017թ. ապրիլին սահմանադրական հանրաքվեից առաջ հանդիպել Նիդերլանդներում բնակվող թուրք ընտրողների հետ: Ավելի ուշ ցամաքային ճանապարհով Հոլանդիա մուտք գործած Քայան արտաքսվել էր երկրից:

Աղբյուր` Dunyabulteni.