Սիրիայի քրդական ուժերը նորից հայտնվել են Թուրքիայի զինուժի թիրախում

Ռազմական06:06, 29 Հոկտեմբեր 2018

Սիրիայի քրդական ուժերը նորից հայտնվել են Թուրքիայի զինուժի թիրախում

Հոկտեմբերի 28-ին Թուրքիայի զինված ուժերը հրետանակոծել են Սիրիայի քրդական ուժերի դիրքերը Սիրիայի Զոր Մաղար շրջանը, որտեղ քրդական կողմը ուներ մի շարք հենակետեր։ Շրջանը գտնվում Եփրատ գետի արևելյան հատվածում՝ Թուրքիայի հետ սահմանին։

Թուրքական աղբյուրի համաձայն՝ այդ հենակետերից քրդական ուժերը հարձակումներ էին գործում Թուրքիայի վրա։ Արկակոծությունը տեղի է ունեցել «Fırtına» տեսակի հաուբիցներից։

Հետաքրքրական է, որ Թուրքիայի զինված ուժերի գործողությունները տեղի ունեցան նախագահ Ռեջեփ Թայիփ Էրդողանի վերջին հայտարարությունից հետո, որում ասված էր.

«Շատ շուտով Եփրատ գետի արևելյան հատվածում գտնվող ահաբեկիչներին ոչնչացնելու ենք»։

Էրդողանը հավելել է, որ իրենք քուրդ զինյալներից մաքրելու են նաև թուրք-իրաքյան սահամնը։

Հիշեցնենք, որ Թուրքիան Սիրիայի քրդական կառույցներին համարում է ահաբեկչական և նույնացնում իր տարածքում գործունեություն ծավալող «Քուրդիստանի բանվորական կուսակցության» (ՔԲԿ-PKK) հետ։

Սիրիայի քրդական ուժերի դեմ Թուրքիայի զինված ուժերի կողմից իրականացրած ամենալայնամասշտաբ ռազմական գործողությունը եղել է Սիրիայի Աֆրին շրջանում՝ «Ձիթենու ճյուղ» անվամբ։ Այդ գործողության հետևանքով Աֆրինը դուրս եկավ Սիրիայի քրդական ուժերի վերահսկողությունից։

Աղբյուր` Akşam