Ընդդիմադիր թուրք գործիչը՝ Էրդողանին. «Իմ որդին կրել է այս երկրի ուսադիրը, իսկ քո որդին ի՞նչ է արել»

Քաղաքական13:07, 30 Հոկտեմբեր 2018

Ընդդիմադիր թուրք գործիչը՝ Էրդողանին. «Իմ որդին կրել է այս երկրի ուսադիրը, իսկ քո որդին ի՞նչ է արել»

Թուրքիայի ընդդիմադիր քեմալական «Ժողովրդահանրապետական» կուսակցության նախագահ Քեմալ Քըլըչդարօղլուն պատասխանել է Թուրքիայի նախագահ Ռեջեփ Թայիփ Էրդողանի քննադատություններին։

Էրդողանի և Քըլըչդարօղլուի միջև նոր լարվածություն էր առաջացել այն բանից հետո, երբ Թուրքիայի Թունջելի նահանգում 2 թուրք զինվոր սպանվել էր քուրդ զինյալների կողմից։

Բանն այն էր, որ Քըլըչդարօղլուն քննդատատել էր Էրդողանին այն բանի համար, որ Թուրքիայի որոշ նահանգներում թուրք զինվորներն անհրաժեշտ սպառազինություն չունեն։ Ընդդիմադիր գործիչի զայրույթն էր առաջացրել նաև այն փաստը, որ սպանված թուրք զինվորների մարմինները դեռևս չեն հայտնաբերվել։

Էրդողանն էլ պնդել է, որ թուրք զինվորներն ունեն ժամանակակից սպառազինություն։ «Առանց իմանալու ինչո՞ւ ես խոսում»,-ասել էր Էրդողանը և հիշեցրել, որ իր պապը հանուն Թուրքիայի զենքը ձեռքին կռվել է ռուսների դեմ և զոհվել Սարիղամիշում։

Ի պատասխան Քըլըչդարօղլուն ասել էր.

«Ես ամեն ինչ շատ լավ եմ հասկանում։ Ես գնացել եմ այնտեղ, ուր դու չես գնացել։ Որդիս կրել է այս երկրի ուսադիրը, իսկ քո որդին ի՞նչ է արել։ Ռազմական հեղաշրջման փորձի ժամանակ գումար հավաքվեց, ի՞նչ եղան դրանք։ Ինչո՞ւ այդ գումարը չհանձնվեց զոհվածների հարազատներին»։

Հիշեցնենք, որ Սարիղամիշի ճակատամարտը եղել է առաջին համաշխարհային պատերազմում ռուսական և օսմանյան կայսրությունների ամենամեծ ռազմական բախումներից մեկը։ Բուն մարտական գործողությունները տևել են 1914-ի դեկտեմբերի 22-ից մինչև 1915-ի հունվարի 17-ը։ Ավարտվել է թուրքերի լիակատար պարտությամբ։