Հրանտ Դինքի մասին պատմող գիրքը արժանացել է ֆրանսիական հեղինակավոր «Ռընոդո» մրցանակին

Մշակութային12:04, 09 Նոյեմբեր 2018

Հրանտ Դինքի մասին պատմող գիրքը արժանացել է ֆրանսիական հեղինակավոր «Ռընոդո» մրցանակին

Ֆրանսիայի ամենահեղինակավոր գրական մրցանակներից մեկը՝ «Ռընոդո»-ն, շնորհվել է Վալերի Մանտոյին՝ պոլսահայ գրող, հրապարակախոս և լրագրող Հրանտ Դինքի կյանքը պատմող «Ակոսը» («Le Sillon») վեպի համար: Սա հեղինակի երկրորդ գիրքն է, որը լույս է տեսել 2018թ․ օգոստոսին։

33-ամյա գրողը մրցանակը ստացել է նոյեմբերի 7-ին՝ Փարիզում։ Իր ելույթում նա նշել է, որ հիացած է Հրանտի գաղափարախոսությամբ և նրա մասին գիրք գրելու միտքը ծագել է հենց Դինքի կենսագրությունը ընթերցելիս։

«Դինքի քաղաքական դիրքորոշումը շատ հետաքրքիր էր։ Նրա նպատակը ոչ այնքան սեփական իրավացիությունը ապացուցելն էր, որքան մարդկանց առերեսումը, նրանց առաջընթացն ապահովելը», - նշել է Մանտոն։

Հավելենք, որ Վալերի Մանտոն ֆրանսիական «Charile Hebdo» երգիծական ամսագրի նախկին աշխատակից է։ Նրա գրքի՝ գլխավոր մրցանակին արժանանալը անակնկալ է եղել, քանի որ այն եզրափակիչ անցած հինգ գրքերի ցանկում տեղ չէր գտել։

Աղբյուր` Agos