Թուրքիայում հրապարակվել են արտահանման և ներմուծման ցուցանիշները

Տնտեսական09:30, 30 Նոյեմբեր 2018

Թուրքիայում հրապարակվել են արտահանման և ներմուծման ցուցանիշները

Թուրքիայի վիճակագրական ծառայությունը հրապարակել է 2018թ. հոկտեմբերին արձանագրված արտահանման և ներկրման ցուցանիշները: Ըստ այդմ՝ արտահանումը 2017թ. նույն ամսվա համեմատ աճել է 13%-ով՝ կազմելով 15 մլրդ 719 մլն դոլար, իսկ ներկրման ծավալները նվազել են 23.8 %-ով՝ կազմելով` 16 մլրդ 176 մլն դոլար:

Նշվում է նաև, որ նախորդ տարվա նույն ժամանակահատվածի համեմատ 13.8 %-ով ավելացել են արտահանման ծավալները դեպի Եվրամիության երկրներ: Այդ ցուցանիշը կազմել է 7 մլրդ 825 մլն դոլար:

2018թ. հոկտեմբերին Թուրքիայում 93.8%-ով նվազել է արտաքին առևտրի դեֆիցիտը՝ կազմելով 456 մլն դոլար:

Թուրքիայից կատարվող արտահանումների ամենամեծ ծավալը բաժին է ընկել Գերմանիային՝ կազմելով 1 մլրդ 457 մլն դոլար: Թուրքիայից խոշոր ծավալներով արտահանում է իրականացվել նաև Միացյալ Թագավորություն (1 մլրդ 68 մլն դոլար), Իտալիա (877 մլն դոլար) և Իրաք (852 մլն դոլար):

Իսկ ներմուծման ամենամեծ ծավալը բաժին է ընկել Ռուսաստանին (1 մլրդ 865 մլն դոլար), որին հաջորդել են Գերմանիան` 1 մլրդ 559 մլն դոլար, Չինաստանը` 1 մլրդ 366 մլն և ԱՄՆ-ն` 883 մլն դոլար:

Աղբյուր` Ahaber