Էրդողանը քննադատել է ընդդիմադիր կուսակցապետին.«Քո դարդը հայրենասիրությունը չէ»

Քաղաքական09:34, 03 Դեկտեմբեր 2018

Էրդողանը քննադատել է ընդդիմադիր կուսակցապետին.«Քո դարդը հայրենասիրությունը չէ»

Թուրքիայի նախագահ Ռեջեփ Թայիփ Էրդողանն Արգենտինայում լրագրողների հետ հանդիպմանն անդրադարձել է ընդդիմադիր «Ժողովրդահանրապետական կուսակցության» (ԺՀԿ/CHP) նախագահ Քեմալ Քըլըչդարօղլուի բեռլինյան հանդիպումներին:

Նշենք, որ ըստ Էրդողանի պնդումների՝ ընդդիմադիր կուսակցության առաջնորդը Բեռլինում հանդիպել է Թուրքիայում ահաբեկչական համարվող «Քուրդիստանի բանվորական կուսակցության» (ՔԲԿ/PKK) և գյուլենական համայնքի ներկայացուցիչների հետ:

«Սա ցույց է տալիս, թե որտեղ է Քըլըչդարօղլուն: Իր «դարդը» հայրենասիրությունը չէ: Ով Թուրքիայի թշնամու հետ կողքին է, նրա հետ թև թևի տված է, ես չեմ կարող նրան բարի աչքով նայել»,- ասել է Էրդողանը:

Վերջինս նշել է, որ Քըլըչդարօղլուն հանդիպել է Բունդեսթագի պատգամավոր Սևիմ Դաղդելենի հետ, ով լուսանկարներ ունի Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդական ինքնապաշտպանական ջոկատներ»-ի (ԺԻՋ-YPG) ներկայացուցիչների հետ:

«Դու ինչպե՞ս կարող ես նրանց հետ հանդիպել: Գնում այնտեղ ու մեր իշխանություններից, Թուրքիայից բողոքում ես: Այստեղից կոչ եմ անում բոլոր լրատվամիջոցներին բացեիբաց ներկայացնել, պարզել, թե Սևիմ Դաղդելենը Գերմանիայում, որ կուսակցության անդամ է, ինչ գործունեություն է ծավալում տվյալ կուսակցությունը, որպեսզի ԺՀԿ-ի ընտրազանգվածը լինի իրազեկված»:

Աղբյուր` Ahaber