ERMENI HABER AJANSI

Եթե Թուրքիան գնի ռուսական S-400 ՀՕՊ համակարգերը, ապա ամերիկյան F-35 ռազմական ինքնաթիռների վաճառքը Թուրքիային առնվազն որոշ ժամանակով կհետաձգվի։ Նախագահ Դոնալդ Թրամփն արդեն ստորագրել է համապատասխան օրենքի նախագիծ, ըստ որի՝ S-400-ի գնման դեպքում Թուրքիան մինչև 2019 թ․ նոյեմբերի 1-ը F-35 չի ստանա։

Խնդիրն այն է, որ նշված օրինագծով նախատեսվում է, որ ԱՄՆ-ի պետքարտուղարությունն ու պաշտպանության նախարարությունը պետք է  նախապատրաստեն համատեղ զեկույց՝ պարզելու և ցույց տալու համար այն հնարավոր վտանգները, որ կարող են ի հայտ գալ՝ Թուրքիայի կողմից S-400 համակարգերի գնման դեպքում։

Այդ զեկույցի պատրաստման ժամկետ է նշանակվել նոյեմբերի 1-ը, իսկ մինչ այդ Թուրքիային F-35 ինքնաթիռներ չեն վաճառվի։

Նշենք, որ ավելի վաղ հայտնի էր դարձել, որ մինչև 2019թ․ ամառվա վերջը Ռուսաստանը կարող է Թուրքիային մատակարարել S-400 ՀՕՊ համակարգերը։

Մյուս կողմից, իսրայելյան մամուլում տեղ գտած հրապարակումների համաձայն, եթե ԱՄՆ-ը վերջնականապես դադարեցնի Թուրքիային F-35 ռազմական ինքնաթիռների վաճառքի նախագիծը, ապա Իսրայելը պատրաստ է գնել պատվիրված ողջ խմբաքանակը։