Թուրքիայում ըննդիմադիր կուսակցության թեկնածուն գլխաշորեր է նվիրել կանանց

Քաղաքական07:03, 22 Մարտ 2019

Թուրքիայում ըննդիմադիր կուսակցության թեկնածուն գլխաշորեր է նվիրել կանանց

Թուրքիայում մարտի 31-ին կայանալիք ՏԻՄ ընտրությունների նախընտրական քարոզարշավի ժամանակ ընդդիմադիր «Ժողովրդահանրապետական կուսակցության» (ԺՀԿ-CHP) թեկնածուն գլխաշորեր է նվիրել կանանց:

«Ազգ» (Millet-Միլլեթ) դաշինքի՝ Փենդիքում առաջադրած համայնքապետի թեկնածու Սալիհ Ուսթան, փողոց առ փողոց շրջելով, գլխաշորեր է բաժանել և ասել, որ մինչև վերջ պաշտպանելու են հավատքի ազատությունը:

Միջանկյալ նշենք, որ ՏԻՄ ընտրություններին CHP և «Լավ» (İYİ) կուսակցությունները հանդես են գալիս «Ազգ» դաշինքով:

Ուսթան նշել է, որ Փենդիքում ավելի քան կես միլիոն ընտրող կա:

Նրա խոսքով` Փենդիքը փոքր Թուրքիա է, որտեղ բնակվում են քաղաքացիներ երկրի բոլոր նահանգներից:

«Մենք փորձում ենք մարդկանց հետ առերեսվել և դառնալ նրանց գաղափարակիցը:: Գլխաշորը մեր իրականությունն է: Հավատավոր մեր քույրերին գլխաշորեր ենք նվիրում և դա չենք անում, որպեսզի քվեներ կորզենք նրանցից: «Ազգ» դաշինքը հավատի գրավականն է»,- ասել է համայնքապետի թեկնածուն:

Նրա փոխանցմամբ` CHP-ն դեմ չի եղել գլխաշորին:

Հիշեցնենք, որ CHP-ն հիմնադրումից սկսած եղել է ձախակողմյան սոցիալ-դեմոկրատական կուսակցություն, որը հիմնված է եղել Աթաթուրքի գաղափարախոսության վրա: Թուրքիայի Հանրապետության և CHP-ի հիմնադիր Մուսաթաֆա Քեմալ Աթաթուրքի իշխանության օրոք` 1925թ. նոյեմբերի 25-ին ընդունվել է ֆեսի արգելման և դրա փոխարեն եվրոպական գլխարկ ու հագուստ կրելու մասին օրենքը: Ինչ վերաբերում է կանանց գլխաշորերին, օրենքով դա չի արգելվել, սակայն Մուստաֆա Քեմալն իր ընտանիքի օրինակով փորձել է հասնել կանանց ազատականացման՝ դա համարելով հասարակության զարգացման անհրաժեշտ պայման:

Աղբյուր` Cumhuriyet