Թուրքիայում ընդդիմադիր լիդերին բռունցքով խփած անձը իշխող կուսակցությունից է

Քաղաքական09:10, 22 Ապրիլ 2019

Թուրքիայում ընդդիմադիր լիդերին բռունցքով խփած անձը իշխող կուսակցությունից է

Թուրքիայի իշխող «Արդարություն և զարգացում կուսակցության» (ԱԶԿ-AKP) մամուլի խոսնակ Օմեր Չելիքն անդրադարձել է ընդդիմադիր կուսակցապետ Քեմալ Քըլըչդարօղլուի դեմ կատարված հարձակմանը: Չելիքը նշել է, որ թուրք զինվորների թաղման արարողությանը մասնակցած ընդդիմադիր «Ժողովրդահանրապետական կուսկացության» (ԺՀԿ-CHP) նախագահ Քըլըչդարօղլուի վրա հարձակվածներից մեկն իրենց (AKP) կուսակցության անդամներից է:

«Որոշում է կայացվել Քըլըչդարօղլուին հարվածած Օսման Սարըգյունին ուղարկել նահանգային կարգապահական հանձնաժողով: Նրան ներկայացվել է կուսակցության անդամությունից հրաժարականի պահանջ»,-ասել է Չելիքը՝ շեշտելով, որ AKP-ն դեմ է ցանկացած բռնության:

Հիշեցնենք, որ ապրիլի 21-ին Թուրքիայի Անկարա նահանգի Չուբուք շրջանում հարձակում է տեղի ունեցել ընդդիմադիր կուսակցապետ Քեմալ Քըլըչդարօղլուի դեմ։ Ընդդիմադիր կուսակցապետը մասնակցում էր մի քանի օր առաջ Թուրքիայի Հաքքարի նահանգում քուրդ զինյալների հետ բախման ժամանակ սպանված թուրք զինվորների թաղման արարողությանը։

Արարողության ժամանակ հավաքվածներից ոմանք վիրավորական խոսքեր են հնչեցրել Քըլըչդաչօղլուի հասցեին։

Այն պահին, երբ անվտանգության աշխատակիցները փորձել են տարածքից հեռացնել ընդդիմադիր լիդերին, մեկը բռունցքով հարվածել էր Քըլըչդարօղլուի դեմքին։ Հարվածի պահը ֆիքսել են տեսախցիկները։

Անվտանգության աշխատակիցների ձեռնարկած միջոցների շնորհիվ Քըլըչդարօղլուն տեղափոխվել է մոտակա տներից մեկը։ Ամբոխից կոչեր էին հնչել վառել այդ տունը:

Աղբյուր` Haberler