ERMENI HABER AJANSI

Թուրքիայի փոխնախագահ Ֆուաթ Օքթայը ռուսական S-400 զենիթահրթիռային ՀՕՊ համակարգերի ձեռքբերման վերաբերյալ հայտարարությամբ է հանդես եկել:

Ֆուաթ Օքթայը նշել է, որ Թուրքիան իր որոշումն արդեն կայացրել է S-400-ի հարցում:

«Թուրքիան անկախ երկիր է և իր պաշտպանությանը վերաբերող որոշումներն ինքն է կայացնում: Թուրքիան ունեցել է ՀՕՊ համակարգերի կարիք, կնքել է պայմանագիր ու պահում է այդ խոստումը»,- ասել է փոխնախագահը:

Օքթայը քննադատել է ԱՄՆ-ի սպառնալից այն հայտարարությունները, ըստ որոնց՝ Թուրքիայի նկատմամբ պատժամիջոցներ կսահմանի:

ԱՄՆ-ի` պատժամիջոցներով սպառնալու հայտարարությունները, ըստ Օքթայի, նշանակում են, որ իրենք Թուրքիային չեն ճանաչում:

«Ոչ ոք չի կարող Թուրքիայի դեմ սպառնալից հայտարարություններ օգտագործել ու համագործակցել: Թուրքիան նորաթուխ պետություն չէ: Այն և պետական միավոր է, և տարածաշրջանի տնտեսապես անվտանգ կետը»,- հայտնել է Օքթայը: 

Հիշեցնենք, որ Ռուսաստանն այդ համակարգերի առաջին խմբաքանակը Թուրքիային մատակարարելու է 2019-ի ամռանը։ Այդ կապակցությամբ ԱՄՆ-ն հայտարարել է, որ եթե թուրքական կողմը գնի ռուսական S-400-ներն, ապա Թուրքիան կարող է դուրս գալ ամերիկյան F-35 ռազմական ինքնաթիռների նախագծից, որոնք ըստ թուրք-ամերիկյան պայմանագրի պետք է մակատարարվեն Անկարային։