Էրդողանի կուսակցությունը Ստամբուլի քաղաքապետի նոր ընտրություններին կմասնակցի պարտված թեկնածուով

Քաղաքական12:02, 07 Մայիս 2019

Էրդողանի կուսակցությունը Ստամբուլի քաղաքապետի նոր ընտրություններին կմասնակցի պարտված թեկնածուով

Թուրքիայի նախագահ Ռեջեփ Թայիփ Էրդողանի գլխավորած իշխող «Արդարություն և զարգացում» կուսակցությունը Ստամբուլի քաղաքապետի նոր ընտրություններին կրկին Բինալի Յըլդըրիմի թեկնածությամբ կմասնակցի:

Այդ մասին հայտարարել է Էրդողանը՝ ԱԶԿ-ի խորհրդարանական խմբակցության հետ անցկացրած հանդիպումից հետո:

«Ընտրությանը մասնակցող թեկնածուները հայտնի են, մեր թեկնածուն էլ կրկին պարոն Բինալի Յըլդըրըմն է»,- ի պատասխան լրագրողների հարցերին՝ ասել է ԱԶԿ-ի նախագահը:

Հիշեցնենք, որ մարտի 31-ին տեղի ունեցած ՏԻՄ ընտրությունների ժամանակ իշխող կուսակցությունից Ստամբուլի քաղաքապետի պաշտոնին առաջադրված երկրի նախկին վարչապետ ու նախկին ԱԺ նախագահ Յըլդըրըմը, ըստ ԿԸՀ-ի վերջնական տվյալների, մոտ 14000-ով ավելի պակաս ձայն էր հավաքել, քան ընդդիմադիր «Ժողովրդահանրապետական կուսակցության» (CHP-ԺՀԿ) թեկնածու Էքրեմ Իմամօղլուն:

Ստամբուլում պարտված իշխող «Արդարություն և զարգացում կուսակցությունը» (AKP-ԱԶԿ) քաղաքի տարբեր շրջանների արդյունքները բողոքարկելուց հետո ԿԸՀ էր ներկայացրել քաղաքապետի ընտրությունը չեղարկելու և նոր ընտրություն անցկացվելու պահանջով դիմումը: Դրանից օրեր անց ԿԸՀ-ը որոշում կայացրեց չեղարկել ընտրությունները՝ չեղյալ հայտարարելով 14.000 ձայնի առավելությամբ քաղաքապետ ընտրված ընդդիմադիր ԺՀԿ-ի թեկնածու Էքրեմ Իմամօղլուի մանդատը:

Թուրքիայի խոշորագույն քաղաքի քաղաքապետի նոր ընտրությունների օր է նաշանակվել հունիսի 23-ը:

Աղբյուր` Haberler