Թուրքիայում 18 տարում ոչնչացվել է անտառածածկույթի 4․6 տոկոսը

Տնտեսական13:09, 15 Օգոստոս 2019

Թուրքիայում 18 տարում ոչնչացվել է անտառածածկույթի 4․6 տոկոսը

Անտառների մոնիտորինգով զբաղվող միջազգային «Global Forest Watch» ցանցի հրապարակած քարտեզների համաձայն՝ Թուրքիայի իշխող կուսակցության օրոք երկրում հսկայական մասշտաբներով անտառներ են ոչնչացվել։

Հրապարակված քարտեզից հայտնի է դարձել, որ Ստամբուլում 2010թ․ դրությամբ անտառածածկույթը կազմում էր 190 գլոբալ հեկտար։ Մինչև 2018թ․ Ստամբուլում ոչնչացվել է 1․45 գլոբալ հեկտար մակերեսով անտառ։ Իսկ 2001-2018թթ․ ոչնչացված անտառածածկույթի մակերեսը կազմել է 25․1 գլոբալ հեկտար։ Այլ կերպ ասած՝ Ստամբուլը կորցրել է իր անտառների շուրջ 13 տոկոսը։

Նշենք, որ գլոբալ հեկտար (ԳՀԱ) տերմինը պայմանական միավոր է, որն արտահայտում է ցամաքային կամ ջրային տարածքների կենսաբանական արտադրության հեկտարը՝ կենսաարդյունավետության համաշխարհային միջինացված ցուցանիշով:

Մեկ այլ քարտեզում արտացոլվել են Թուրքիայի բոլոր բնական անտառներն ու դրանց փոփոխությունները։ Ըստ այդմ՝ 2010թ․ Թուրքիայում 8․67 մլն հեկտար մակերեսով բնական անտառներ են եղել։ 2018թ․ դրությամբ այդ բնական անտառներից 33․9 գլոբալ հեկտարը ոչնչացվել է։ 2000թ․-ից 2018թ․-ն ընկած ժամանակահատվածում անտառների կորուստը կազմել է 461 գլոբալ հեկատար կամ անտառածածկույթի ընդհանուր մակերեսի 4․6 տոկոսը։