Ըստ թուրք ընդդիմադիր գործչի՝ ազգայնականների քվեները անցնելու են Բաբաջանի կուսակցությանը

Քաղաքական17:49, 25 Սեպտեմբեր 2019

Ըստ թուրք ընդդիմադիր գործչի՝ ազգայնականների քվեները անցնելու են Բաբաջանի կուսակցությանը

Թուրքիայի ընդդիմադիր, ազգայնական ուղղվածության «Լավ» (İyi Parti) կուսակցության առաջնորդ Մերալ Աքշեները հրապարակել է սոցհարցման արդյունքների մասին իր ունեցած տվյալները։

Ըստ այդ տվյալների՝ «Ազգայնական շարժում» կուսակցության (MHP-ԱՇԿ) ձայները մասնավորապես Թուրքիայի արևելյան շրջաններում անցնելու են նախկին վարչապետ Ահմեթ Դավութօղլուի և նախկին արտգործնախարար Ալի Բաբաջանի կողմից հիմնվելիք քաղաքական ուժին։

Մերալ Աքշեները նշել է նաև, որ անհամբերությամբ է սպասում նոր քաղաքական կուսակցության ձևավորմանը վերոնշյալ գործիչների կողմից, քանի որ Թուրքիայում քաղաքական կյանքը, ըստ նրա, ճահճացման փուլում է, և անհրաժեշտություն կա նոր գույների, այլընտրանքի և բազմազանության։

Իրենց կուսակցության ձայներից էլ որոշակի հատված Աքշեների համոզմաբ անցնելու է Դավութօղլու գլխավորած քաղաքական ուժին և այս պահին ազգայնական ուղղվածության «Լավ» (İyi Parti) կուսակցության վարկանիշը շուրջ 11 տոկոս է կազմում։