Թուրքիան փորձարկում է Ռուսաստանից գնած S-400 ՀՕՊ համակարգերը

Ռազմական16:52, 25 Նոյեմբեր 2019

Թուրքիան փորձարկում է Ռուսաստանից գնած S-400 ՀՕՊ համակարգերը

Թուրքիան նոյեմբերի 25-ին և 26-ին փորձարկելու է Ռուսաստանից գնած հակաօդային պաշտպանության S-400 զենիթահրթիռային համակարգերի առաջին դիվիզիոնը, որը տեղակայված է մայրաքաղաք Անկարայում:

Փորձարկումների շրջանակներում Անկարայի օդային տարածքով թռչելու են օդուժի տարբեր տեսակի միավորներ: Նշվում է, որ տարբեր բարձրության թռիչքների ժամանակ օգտագործվելու են նաև ամերիկյան F-16 կործանիչներ:

Փորձարկումները կարող են շարունակվել նաև առաջիկա օրերին: Անկարայի նահանգապետարանը հայտարարություն է տարածել՝ քաղաքի բնակիչներին զգուշացնելով սպասվող ցածր թռիչքների մասին:

Նշվում է, որ փորձարկումների ավարտից հետո հիշյալ համակարգերը կակտիվացվեն արդեն 2020-ի ապրիլին:

Հիշեցնենք, որ 2.5 մլրդ դոլար պայմանագրային արժեքով S-400 համակարգերի առաջին դիվիզիոնի մատակարարումը իրականացվել էր 2 փուլով՝ ավարտին հասնելով սեպտեմբերի 15-ին: Համակարգերի 2-րդ դիվիզիոնի մատակարարումը կիրականացվի 2020-ին ու կակտիվացվի 2021-ին:

Աղբյուր` Milliyet