Սոցհարցում. գալիք ընտրություններում Էրդողանին հաղթելու շանս ունի միայն Ստամբուլի քաղաքապետը

Քաղաքական16:29, 10 Փետրվար 2020

Սոցհարցում. գալիք ընտրություններում Էրդողանին հաղթելու շանս ունի միայն Ստամբուլի քաղաքապետը

Թուրքիայի առաջիկա նախագահական ընտրություններում գործող նախագահ Ռեջեփ Թայիփ Էրդողանի ամենահավանական հակառակորդը Ստամբուլի քաղաքապետ Էքրեմ Իմամօղլուն է: Այս պահին նա ընտրվելու ավելի շատ շանսեր ունի, քան Էրդողանը:

Այս մասին հայտնի է դարձել թուրքական «Yöneylem» սոցիոլոգիական կազմակերպության իրականացրած հարցումներից: Նշվում է, որ կազմակերպությունը 2020-ից համագործակցում է Թուրքիայի գլխավոր ընդդիմադիր «Ժողովրադահանրապետական կուսակցության» (CHP-ԺՀԿ) հետ, որի անդամն է Իմամօղլուն և կուսակցության պատվերով հարցումներ է իրականացնում Թուրքիայի օրակարգում գտնվող տարբեր թեմաների վերաբերյալ:

Հունվարին իրականացված հարցումների ժամանակ մասնակիցներին հարցրել են, թե առաջիկա նախագահական ընտրություններին ում օգտին են քվեարկելու՝ առաջարկելով ընտրություն կատարել Էրդողանի և 6 այլ հավանական թեկնածուների միջև:

Նշվում է, որ Էրդողանի ու Իմամօղլուի միջև ընտրություն կատարելիս հարցվածների 39.1%-ը նախընտրել է ներկայիս նախագահին, իսկ 41.4%-ը՝ Ստամբուլի գործող քաղաքապետին:

Թուրքիայի 11-րդ նախագահ Աբդուլլահ Գյուլի հետ ենթադրյալ մրցակցության պայմաններում հարցվողների նախընտրությունները բաշխվել են հետևյալ կերպ՝ Էրդողանի օգտին 37%, Գյուլի օգտին 25.2%: Իսկ նախկին արտգործնախարար Ալի Բաբաջանի հետ ենթադրյալ մրցակցության պայմաններում պատկերը հետևյալն է՝ Էրդողան - 37%, Բաբաջան - 27.1%:

Նշվում է, որ հարցումներն իրականացվել են Թուրքիայի 26 նահանգների 120 շրջաններում: Մասնակցել է 2507 քաղաքացի:

Աղբյուր` Т24