ERMENI HABER AJANSI

2020թ․ Թուրքիայում 5 նոր քաղաքական կուսակցություն է հիմնվել։ Դրանով երկրում գործող կուսակցությունների թիվը այս պահին հասել է 83-ի։ Առաջիկայում կհիմնվի ևս մեկը՝ Թուրքիայի նախկին փոխվարչապետ Ալի Բաբաջանի «Ժողովրդավարություն և առաջընթաց» (DEVA) կուսակցությունը, որը այս ցանկում 84-րդը կլինի։

Թեև կուսակցությունը փաստացիորեն արդեն հիմնվել է, սակայն դրա անունը դեռ պաշտոնապես չի հրապարակվել, ուստի այն չի ընդգրկվել Թուրքիայի Գերագույն դատարանի՝ «գործող քաղաքական կուսակցությունների ցանկում»։

Ալի Բաբաջանը կուսակցության հիմնադրման դիմումը ներքին գործերի նախարարությանն է ներկայացրել մարտի 9-ին։ Նա ներկայացրել է կուսակցության հիմնադիրների 90 հոգանոց ցանկը։ Իսկ վաղը՝ մարտի 11-ին, կկազմակերպվի մամլո ասուլիս, որի ժամանակ Բաբաջանը կներկայացնի իր կուսակցությունը, պաշտոնապես կհրապարակի կուսակցության անունը և լոգոն։

Իսկ 2020թ․ Թուրքիայում արդեն իրենց գործունեությունը սկսած 5 կուսակցությունները հետևյալն են․
 

• Հունվարի 2-ին հիմնված «Անատոլիական միություն» կուսակցությունը (ABP)
   
• Փետրվարի 10-ին հիմնված «Լուսավոր ապագա» կուսակցությունը (AYGIP)
   
• «Գլխավոր կենտրոնական» կուսակցությունը (MAP)

• «Ձախ  ժողովրդավարական ժողովրդական» կուսակցությունը (DSHP)

• Փետրվարի 24-ին հիմնված «Ուժերի միություն» կուսակցությունը (GBP)

Հիշեցնենք, որ 2019թ․ դեկտեմբերի 12-ին «Ապագա» (Gelecek Partisi) անունով նոր կուսակցություն էր հիմնել նաև Թուրքիայի նախկին վարչապետ Ահմեթ Դավութօղլուն։