Թուրքիայում նոր ստեղծված կուսակցությունների վարկանիշը՝ ըստ սոցհարցման

Քաղաքական13:56, 12 Մարտ 2020

Թուրքիայում նոր ստեղծված կուսակցությունների վարկանիշը՝ ըստ սոցհարցման

Վերջին ամիսներին Թուրքիայում հիմնվել 5 կուսակցություն: Դրանցից քաղաքական գործոն դառնալու հավակնություն ունեցողները երկուսն են: Երկուսի հիմնադիրներն էլ նախկինում եղել են Թուրքիայի նախագահ Ռեջեփ Թայիփ Էրդողանի գաղափարակիցները: Առաջինը 2019-ի դեկտեմբերի 12-ին հայտարարված «Ապագա» (Gelecek Partisi/ GP) կուսակցությունն է՝ հիմնադրված Թուրքիայի նախկին վարչապետ Ահմեթ Դավութօղլուի կողմից: Երկրորդը Թուրքիայի նախկին փոխվարչապետ և ԱԳ նախարար Ալի Բաբաջանի կողմից 2020-ի մարտի 11-ին հիմնված «Ժողովրդավարություն և առաջընթաց» կուսակցությունն է (Demokrati ve Atılım Partısı-հապավումը՝ DEVA, որը թուրքերեն նշանակում է դարման, լուծում):

Թուրքական հասարակության մեջ որոշակի հետաքրքրություն առաջացրած այս կուսակցությունների նախնական վարկանիշը պարզելու համար տեղի սոցիոլոգիական կազմակերպություններից մեկը հետազոտություն է իրականացրել: Ըստ այդմ Բաբաջանի հիմնված DEVA-ն արդեն 3.4 տոկոս աջակցություն ունի և առաջ է անցել դեկտեմբերին Դավութօղլուի հիմնած կուսակցությունից, որը, ըստ հարցման արդյունքների, ստացել է 2 տոկոսանոց աջակցություն:

Ըստ նույն սոցհարցման՝ Թուրքիայի խորհրդարանական խոշոր կուսակցությունների աջակցությունն այս պահի դրությամբ այսպիսին է.

Իշխող «Արդարություն և զարգացում» կուսակցություն (AKP-ԱԶԿ) – 38.3%

Գլխավոր ընդդիմադիր «Ժողովրդահանրապետական» կուսակցություն (CHP-ԺՀԿ) - 22.6%

«Ազգայնական շարժում» կուսակցություն (ԱՇԿ-MHP)- 11.2%

Ազգայնական «Լավ» կուսակցություն - 10.5%

Քրդամետ «Ժողովուրդների դեմոկրատական» կուսակցություն (HDP-ԺԴԿ) - 9.7%:

Աղբյուր` Haberler.com