Թուրքիան շարունակում է ջանքեր գործադրել ԱՄՆ-ի հետ տարաձայնությունները հարթելու ուղղությամբ

Տարածաշրջան14:22, 15 Ապրիլ 2020

Թուրքիան շարունակում է ջանքեր գործադրել ԱՄՆ-ի հետ տարաձայնությունները հարթելու ուղղությամբ

Թուրքիան վերահաստատել է իր առաջարկը S-400 ՀՕՊ համակարգերի ձեռքբերումից հետո ծագած խնդիրների և ԱՄՆ հետ հարաբերություններում առկա խնդիրները լուծելու համար ՆԱՏՕ-ի մասնակցությամբ հանձնախումբ ստեղծելու մասին։

ՆԱՏՕ-ի շրջանակներում դաշնակից երկու երկրների փոխհարաբերությունները սրվել էին Թուրքիայի կողմից Ռուսաստանից S-400 ՀՕՊ համակարգերի ձեռքբերումից հետո, և ԱՄՆ-ն սպառնալով պատժամիջոցներ կիրառել Թուրքիայի դեմ նաև F-35 կործանիչների ծրագիրն էր չեղարկել։

Մարտի սկզբին, երբ բախումներ տեղի ունեցան Թուրքիայի կողմից հովանավորվող զինյալների և Սիրիայի կառավարական ուժերի միջև Անկարան օգնության խնդրանքով դիմեց Վաշինգտոնին։

Թուրքիայի Արտաքին գործերի նախարար Մևլութ Չավուշօղլուն հայտարարել էր, որ լավ առաջարկի դեպքում հակված են ամերիկյան «Պատրիոտ» ՀՕՊ համակարգեր ձեռք բերել ԱՄՆ-ից։

Սակայն ԱՄՆ-ն իր հերթին ընդգծել էր, որ այդ համակարգերը հնարավոր կլինի ձեռք բերել միայն S-400 ՀՕՊ համակարգերը Ռուսաստանին վերադարձնելուց հետո։

Թուրքիայի նախագահ Ռեջեփ Թայիփ Էրդողանը 2019-ի նոյեմբերին ԱՄՆ կատարած այցի ընթացքում հանդիպել էր նախագահ Դոնալդ Թամփի հետ և համատեղ աշխատանքային խումբ ստեղծելու համաձայնության էին եկել, սակայն այդ ուղղությամբ որևէ լուրջ քայլ չի կատարվել։