Էրդողանի խոսնակը հեգնել է Ավստրիայի ՆԳ նախարարին

Քաղաքական13:42, 02 Սեպտեմբեր 2020

Էրդողանի խոսնակը հեգնել է Ավստրիայի ՆԳ նախարարին

Նախօրեին Ավստրիայի ՆԳ նախարար Կարլ Նեհամմերը հայտարարել էր, որ երկրի անվտանգության ծառայությունները Թուրքիայի օգտին լրտեսություն անող անձ են հայտնաբերել: Նախարարի խոսքով անձը խոստովանել է, որ Անկարայի իշխանությունների համար Ավստրիայում ապրող Թուրքիայի քաղաքացիների, ինչպես նաև Ավստրիայի քաղաքացի թուրքերի շրջանում լրտեսություն է արել ու հավաքած տեղեկությունները փոխանցել Թուրքիայի հատուկ ծառայությունների աշխատակիցներին:

Թեմայի կապակցությամբ խոսել էր նաև Ավստրիայի ինտեգրման նախարար Սյուզան Ռաաբը նշելով, որ Թուրքիայի նախագահ Ռեջեփ Թայիփ Էրդողանի ձեռքերը հասել են մինչև Վիեննա: Ռաաբը ավելացրել էր, որ Անկարան, իր ազդելով Ավստրիայում գործող թուրքական կազմակերպությունների ու մզկիթների վրա, ցանկանում է պառակտել Ավստրիայի հասարակությանը:

Այս վերջին հայտարարությանը հեգնական գրառմամբ անդրադարձել է Թուրքիայի նախագահի խոսնակ Իբրահիմ Քալընը:

Նա Twitter-ի իր միկրոբլոգում տեղադրել է Ավստրիայի հասարակությանը պառակտելու Թուրքիայի ցանկության մասին գրառումը և արձագանքել. «Միայն Ավստրիա՞ն, ինչ ամոթ է»: