Էրդողանը հեռախոսազրույց է ունեցել Բայդենի հետ

Քաղաքական10:26, 24 Ապրիլ 2021

Էրդողանը հեռախոսազրույց է ունեցել Բայդենի հետ

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ԱՄՆ-ի նախագահ Ջո Բայդենի հետ: Այս մասին տելեգրամյան իր ալիքում գրառում է արել Էրդողանը: Նա նշել է, որ Բայդենի հետ համաձայնության են եկել երկկողմ հարաբերությունների ռազմավարական բնույթի և փոխադարձ շահերի հիման վրա համագործակցության ընդլայնման նպատակով համատեղ աշխատանքի կարևորության շուրջ:

Էրդողանի խոսքով՝ ինքը Բայդենին հայտնել է, որ թուրք-ամերիկյան հարաբերությունների մակարդակն ավելի բարձրացնելու համար կարևոր է, որ լուծվի ԱՄՆ-ում ապաստանած գյուլենականների հարցը, որոնք հետախուզվում են Թուրքիայի կողմից: (Անկարան բազմիցս Վաշինգտոնից պահանջել է հանձնել գյուլենականների առաջնորդ Ֆեթուլլահ Գյուլենին-խմբ.):

Մյուս կարևոր հարցը, ըստ Էրդողանի, վերաբերում է Սիրիայում PKK-PYD քրդական «ահաբեկչական կազմակերպություններին» տրամադրվող ԱՄՆ-ի աջակցությանը, ինչից բազմիցս դժգոհել է թուրքական կողմը։

Թուրքիայի նախագահը նաև շեշտել է, որ համաձայնություն է ձեռք բերվել հունիսին անցկացվելիք ՆԱՏՕ-ի անդամ երկրների առաջնորդների գագաթնաժողովում կազմակերպել Բայդեն-Էրդողան հանդիպում։

Աղբյուր` Ermenihaber.am