Թուրքիայի ԱԳՆ. Համաձայնություն է ձեռք բերվել շարունակել խորհրդակցությունները Եգիպտոսի հետ

Տարածաշրջան12:00, 09 Սեպտեմբեր 2021

Թուրքիայի ԱԳՆ. Համաձայնություն է ձեռք բերվել շարունակել խորհրդակցությունները Եգիպտոսի հետ

Թուրքիայի արտաքին գործերի նախարարությունը հաղորդագրություն է տարածել սեպտեմբերի 7-ից 8-ը Եգիպտոսի և Թուրքիայի փոխարտգործնախարարների գլխավորած պատվիրակությունների միջև Անկարայում կայացած խորհրդակցությունների 2-րդ փուլի վերաբերյալ։

Նշվում է, որ կողմերը վերահաստատել են քննարկվող հարցերում առաջընթացի ապահովման ու հարաբերությունների կարգավորման համար հավելյալ քայլեր ձեռնարկելու իրենց ցանկությունը և համաձայնել խորհրդակցությունների շարունակմանը։

Եգիպտոսի արտաքին գործերի փոխնախարար Համդի Սանադ Լոզայի գլխավորած պատվիրակությունը Թուրքիա է մեկնել սեպտեմբերի 7-ին։ Նրա այցին նախորդել էր այս տարվա մայիսին Թուրքիայի փոխարտգործնախարար Սեդաթ Օնալի պատվիրակության՝ Կահիրե կատարած երկօրյա այցը, որի ընթացքում կայացել էին մի շարք հանդիպումներ։

Թուրքական լրատվամիջոցները երկու երկրների միջև վերջին շփումները՝ ներառյալ Թուրքիայի արտգործնախարար Մևլութ Չավուշօղլուի և Եգիպտոսի նրա պաշտոնակցի՝ Սամիհ Շյուքրիի միջև կայացած հեռախոսազրույցը, բնութագրել են որպես 2013թ․ ռազմական հեղաշրջումից հետո լարված հարաբերություններում նոր շրջափուլի սկիզբ։

Աղբյուր` T24.com.tr