Թուրքիայի նախագահը պահանջել է դադարեցնել քաղաքացուն հայհոյած պատգամավորի լիազորությունները

Քաղաքական12:54, 08 Նոյեմբեր 2021

Թուրքիայի նախագահը պահանջել է դադարեցնել քաղաքացուն հայհոյած պատգամավորի լիազորությունները

Թուրքիայի նախագահ Ռեջեփ Թայիփ Էրդողանն ազգայնական «Լավ» կուսակցության (İYİ Parti) առաջնորդ Մերալ Աքշեներից պահանջել է դադարեցնել կուսակցության պատգամավոր Լյութֆյու Թյուրքանի լիազորությունները, քանի որ վերջինս հայհոյել է սպանված զինվորի ընտանիքի անդամին։

«Նահատակի ընտանիքին նման կերպով հայհոյելը մոռացության տալու բան չէ»,- հայտարարել է Էրդողանը։ Նա շեշտել է, որ եթե Աքշեները վերջ չդնի Թյուրքանի պատգամավորությանը, ապա նշանակում է, որ համամիտ է նրա հետ։

Հիշեցնենք, որ նոյեմբերի 5-ին պատգամավոր Լյութֆյու Թյուրքանը Թուրքիայի Բինգյոլ նահանգում հայհոյանքով էր պատասխանել մի քաղաքացու, որը նշել էր, թե «Լավ» կուսակցությունը մոտ է քրդամետ «Ժողովուրդների դեմոկրատական կուսակցությանը» (ԺԴԿ-HDP)։ Այդ տեսագրությունն աղմուկ էր բարձրացրել համացանցում, ինչից հետո Թյուրքանը ներողություն էր խնդրել և հրաժարվել կուսակցության խորհրդարանական ֆրակցիայի ղեկավարի պաշտոնից։