Թուրքիայում արտահերթ ընտրությունների հավանականությունը նվազում է

Քաղաքական17:54, 11 Հունվար 2022

Թուրքիայում արտահերթ ընտրությունների հավանականությունը նվազում է

Թուրքիայի իշխող «Արդարություն և զարգացում» կուսակցության (AKP-ԱԶԿ) և «Ազգայնական շարժում» կուսակցության (MHP-ԱՇԿ) կազմած «Ժողովուրդ» խորհրդարանական դաշինքը ավարտել է ընտրական օրենսգրքում փոփոխությունների նախագիծը: Այս մասին հայտում է «Artı gerçek» լրատվական կայքը:

Կայքը, հղում անելով ԱԶԿ-ի աղբյուրներին, տեղեկացնում է, որ նախագիծը օրակարգ կբերվի փետրվարին: Ըստ թուրքական աղբյուրի՝ դա նշանակում է, որ արտահերթ ընտրություններ կարող են անցկացվել առնվազն 1 տարի հետո, քանի որ այդքան ժամանակ կպահանջվի նախագծով նախատեսվող փոփոխությունները կյանքի կոչելու համար:

Վերջին ամիսներին Թուրքիայում ընդդիմությունը մշտապես խոսում է արտահերթ ընտրություններ անցկացնելու հավանականության մասին: Վերջինն էլ ընդդիմադիր «Ժողովրդահանրապետական» կուսակցության (CHP-ԺՀԿ) նախագահ Քեմալ Քըլըչդարօղլուն էր մի հեռուստաեթերի ժամանակ ասել, որ սեպտեմբերին արտահերթ ընտրություն է կանխատեսում:

Նշենք, որ Թուրքիայում հերթական խորհրդարանական ու նախագահական ընտրությունները նախատեսված են 2023-ի հունիսին:

Աղբյուր` Ermenihaber.am