ԱԶԿ-ն նահանջել է նաև ՏԻՄ վարկանիշային աղյուսակում

Քաղաքական15:18, 14 Մարտ 2022

ԱԶԿ-ն նահանջել է նաև ՏԻՄ վարկանիշային աղյուսակում

Թուրքիայում իշխող «Արդարություն և զարգացում» կուսակցությունը (AKP-ԱԶԿ), ըստ «ORC» հետազոտական ընկերության իրականացրած սոցհարցումների, ետընթաց է արձանագրել Տեղական ինքնակառավարման բնագավառում:

Եթե մինչ այժմ Թուրքիայի նախագահ Ռեջեփ Թայիփ Էրդողանը հաճախ էր շահարկում այն փաստը, որ ԱԶԿ-ական ՏԻՄ ղեկավարներն ամենահաջողվածն են և նրանց վարկանիշը ավելի բարձր է ոչ ԱԶԿ-ականների համեմատությամբ, ապա վերջին սոցիոլոգիական հարցումները ցույց են տվել, որ իշխող ԱԶԿ-ն նահանջել է նաև այս ցուցանիշով:

«ORC» հետազոտական ընկերությունը սոցհարցումներ է իրականացրել փետրվարի 10-ից մարտի 10-ն ընկած ժամանակահատվածում, որի ընթացքում Թուրքիայի 30 խոշոր քաղաքների և 51 նահանգայօն կենտրոնների բնակիչներին ուղղվել է հետևյալ հարցը. «Վերջին 3 տարվա կտրվածքով ինչպես եք գնահատում ձեր քաղաքապետի/նահանգապետի գործունեությունը: Արդյո՞ք այն հաջողված է»:

Ըստ հարցման արդյունքների ամենաբարձր վարկանիշ ունեցողը՝ գլխավոր ընդդիմադիր «Ժողովրդահանրապետական» կուսակցությունը (CHP) ներկայացնող, մայրաքաղաք Անկարայի քաղաքապետ Մանսուր Յավաշն է:

Աղբյուր` Cumhuriyet