Էրդողանի խոսնակը և ԱՄՆ փոխպետքարտուղարն անդրադարձել են ռեգիոնալ խնդիրներին

Քաղաքական12:03, 05 Ապրիլ 2022

Էրդողանի խոսնակը և ԱՄՆ փոխպետքարտուղարն անդրադարձել են ռեգիոնալ խնդիրներին

Թուրքիայի նախագահ Ռեջեփ Թայիփ Էրդողանի մամուլի խոսնակ Իբրահիմ Քալընի և ԱՄՆ փոխպետքարտուղար Վիկտորյա Նուլանդի հանդիպման ընթացքում քննարկվել են տարածաշրջանային մի շարք հարցեր: Կողմերն անդրադարձել են Ռուսաստանի և Ուկրաինայի միջև շարունակվող պատերազմին, ինչպես նաև Սիրիային, Ադրբեջանին, Հայաստանին և Իսրայելին: Այս համատեքստում կարևորվել է էներգետիկ անվտանգությունը, պաշտպանական համագործակցությունը, երկկողմ քաղաքական և տնտեսական հարաբերությունները։

Հանդիպման ընթացքում ընդգծվել է, որ մարտի 29-ին Ստամբուլում կայացած հանդիպումը դրական լիցք է հաղորդել Ռուսաստան-Ուկրաինա բանակցություններին, իսկ Թուրքիան էլ կարևոր դեր ունի Ռուսաստաի և Ուկրաինայի միջև ռազմական գործողությունների դադարեցմանն ուղղված գործընթացում:

Թուրքական կողմը նշել է, որ Էրդողանի գլխավորությամբ Թուրքիան վճռականորեն շարունակելու է իր դիվանագիտական նախաձեռնությունները՝ հրադադարի հասնելու և մարդասիրական միջանցքներ բացելու համար։

Քալընը և Նուլանդը գոհունակություն են հայտնել Թուրքիա-ԱՄՆ ռազմավարական մեխանիզմը կյանքի կոչելու կապակցությամբ՝ հույս հայտնելով, որ այդ մեխանիզմը դրական ազդեցություն կունենա երկկողմ հարաբերությունների ընթացքի վրա։

Աղբյուր` https://www.tccb.gov.tr