Մոսկվան շարունակում է «համոզել» Անկարային Սիրիայում ռազմագործողություն չսկսել

Ռազմական23:41, 12 Դեկտեմբեր 2022

Մոսկվան շարունակում է «համոզել» Անկարային Սիրիայում ռազմագործողություն չսկսել

Մոսկվայի ու Անկարայի միջև շարունակվում են քննարկում-բանակցությունները Սիրիայի հյուսիսում Թուրքիայի հնարավոր ռազմագործողություն իրականացնելու հարցում: Այս մասին հայտարարել է Մերձավոր Արևելքի հարցերով ՌԴ նախագահ Վլադիմիր Պուտինի հատուկ ներկայացուցիչ Միխայիլ Բոգդանովը: Վերջինը նշել է, որ իրենք շարունակում են աշխատանքները ցամաքային ռազմագործողության մտադրությունից հրաժարվելու հարցում Անկարային համոզելու ուղղությամբ:

Թուրքական աղբյուրը ուշադրություն է հրավիրել այն հանգամանքի վրա, որ Բոգդանովն այս հայտարարությունն արել է այնպիսի ժամանակահատվածում, երբ Թուրքիան շարունակում է օրակարգում պահել Սիրիա ներխուժման թեման:

Օրեր առաջ էլ Ռուսաստանի փոխարտգործնախարար Սերգեյ Վերշինինն էր մեկնել Թուրքիա։ Այցի օրակարգային թեմանից մեկն էլ եղել է Սիրիայում տեղի ունեցող վերջին զարգացումները՝ Թուրքիայի կողմից Սիրիայի հյուսիսում ցամաքային ռազմական գործողություններ սկսելու համատեքստում:

Թուրքական մամուլի հաղորդմամբ՝ Անկարան շարունակում է նախապատրաստական աշխատանքներ իրականացնել Սիրիայի հյուսիսում 30 կմ-ոց անվտանգության գոտի ստեղծելու նպատակով։

Նշվում է, որ հնարավոր ցամաքային ներխուժման դեպքում Թուրքիայի զինված ուժերի առաջին թիրախը Սիրիայում լինելու են Այն էլ Արաբ (Քոբանի), Մանբիչ և Թել Ռըֆաթ քաղաքները, որոնք ներկայում վերահսկվում են Սիրիայի քրդական զինված կազմավորումների կողմից: Պաշտոնական Անկարան Սիրիայի քրդական կազմակերպություններին համարում է ահաբեկչական՝ դրանց նույնացնելով Քուրդիստանի բանվորական կուսակցություն ռազմաքաղաքական կազմակերպության հետ: