Խոսքի ազատության սահմանափակումներ Թուրքիայում

Քաղաքական11:07, 03 Մարտ 2023

Խոսքի ազատության սահմանափակումներ Թուրքիայում

Փետրվարի 21-ին Թուրքիայի տեղեկատվական տեխնոլոգիաների և կապերի խորհրդի (Bilgi Teknolojileri ve İletişim Kurumu - BTK) կողմից որոշում էր կայացվել փակել Թուրքիայում գործող «Ekşi Sözlük» առցանց բառարանը, որը յուրահատուկ հարթակ է նաև դրա բաժանորդների ազատ արտահայտման, մտքերի փոխանցման համար: Հարթակը վերաբացելու մարտի 1-ի որոշումից մեկ օր անց, սակայն, դրա հասանելիությունը կրկին սահմանափակվել է։

Նշվում է, որ առցանց հարթակը, որն ունի ավելի քան 400 հազար բաժանորդ, արգելափակվել է Թուրքիայի իշխանությունների համար ոչ այնքան ցանկալի հրապարակումների պատճառով։ Ըստ բրիտանական «The Guardian» թերթի՝ այդ քայլը հերթական անգամ ապացուցում է, որ Թուրքիայում առկա է խոսքի ազատության սահմանափակում:

«Ekşi Sözlük»-ի արգելափակման համար դեռ Թուրքիայի տեղեկատվական տեխնոլոգիաների և կապերի խորհրդի կողմից որևէ պատճառաբանություն չի ներկայացվել։ Թուրքական մամուլում և սոցցանցերում շրջանառվում են որոշ վարկածներ, սակայն, որ որոշումը պայմանավորված է հարթակում երկրաշարժից հետո օգտատերերի փոխանցած տեղեկությունների և արտահայտած դժգոհության հետ։

Հիշեցնենք, որ Թուրքիայի տարածքում բառարանի հասանելիության արգելափակման քննադատությամբ էին հանդես եկել նաև գլխավոր ընդդիմադիր «Ժողովրդահանրապետական» կուսակցության (ԺՀԿ-CHP) առաջնորդ Քեմալ Քըլըչդարօղլուն, Ստամբուլի քաղաքապետ Էքրեմ Իմամօղլուն և այլ ընդդիմադիր գործիչներ։

«Ամենակրիտիկական ժամերին փակեցին Twitter-ը, չկարողացա լսել օգնության կոչերը։ Հիմա էլ կտրեցին բառարանի ձայնը»,-գրել է Քըլըչդարօղլուն՝ Թուրքիայի նախագահականի հանրային կապերի վարչությանը հորդորելով ձեռքերը հեռու տանել «Ekşi Sözlük»-ից։

Աղբյուր` ArtıGerçek.com