Թուրքիայի և Սաուդիան Արաբիայի միջև ուղղակի ներդրումների հուշագիր է ստորագրվել

Տնտեսական11:02, 18 Հուլիս 2023

Թուրքիայի և Սաուդիան Արաբիայի միջև ուղղակի ներդրումների հուշագիր է ստորագրվել

Թուրքիայի նախագահ Ռեջեփ Թայիփ Էրդողանը հուլիսի 17-ին պաշտոնական այցով մեկնել էր Սաուդիան Արաբիա: Այդ երկրի թագաժառանգ Մուհամմադ Բին Սալմանը Էրդողանին պաշտոնական արարողությամբ դիմավորել է Ջիդդե քաղաքում:

Այնուհետև տեղի է ունեցել Էրդողանի և Սալմանի դռնփակ հանդիպումը, որին ներկա են գտնվել նաև թուրքական պատվիրակության անդամները:

Տեղեկացվում է, որ կողմերը ստորագրել են մի շարք հուշագրեր, որոնք վերաբերում են պաշտպանական արդյունաբերությանը, էներգետիկային, կապին և այլ ոլորտներին:

Երկու երկրների միջև ստորագրվել է նաև փոխըմբռնման հուշագիր՝ ուղղակի ներդրումների խթանման ոլորտում համագործակցության մասին:

Երկկողմ հանդիպումից հետո Էրդողանը Սալմանին է նվիրել թուրքական արտադրության «Togg» մակնիշի մեքենա, որով էլ հենց թագաժառանգի հետ ուղևորվել է հյուրանոց:

Հիշեցնենք, որ Թուրքիայի նախագահականի հանրային կապերի վարչության դեռևս երեկ տարածած հաղորդագրության համաձայն՝ նախագահ Ռեջեփ Թայիփ Էրդողանը հուլիսի 17-ից 19-ն ընկած ժամանակահատվածում պաշտոնական այցով գտնվելու էր Սաուդիան Արաբիայում, Կատարում, ապա նաև Արաբական Միացյալ Էմիրություններում (ԱՄԷ) :

Հայտարարության մեջ նշվում էր նաև, որ հանդիպումների ընթացքում հիմնականում քննարկվելու են հարցեր՝ կապված երկկողմ համագործակցության ոլորտի և ուղղակի ներդրումների հետ:

Սաուդիան Արաբիայի և Թուրքիայի ղեկավարների հանդիպումը մեծ արձագանք է գտել նաև սաուդական մամուլում:

Հիմնականում նշվում է, որ կողմերը պայմանավորվել են առաջ շարժվել երկկողմ հարաբերությունների զարգացման օրակարգով:

Աղբյուր` trthaber.com